ننګرهار کې د ختیځ لبنیاتو کار خونه د ورځې درې زره او ۵۰۰ کیلوګرامه شېدې پروسیس وړتيالري

۲۲لړم ۱۴۰۰
ختیځ لبنیاتو  کارخونه شاوخوا لس کاله  وړاندې د لس زره کیلو ګرامو په ظرفیت  د کرنې او مالدارۍ وزارت له لورې د ختیځ زون د مالدارانو لپاره د جوړیدو ډبره کېښودل شوه.
یاده کارخونه اوس د ننګرهار د ځینو ولسواليو څخه هره ورځ تازه شېدې راټولوي او بیایې په لوړ کیفیت پروسیسوي،  ترڅو تازه، صحي او خوندوره شړومبې،  مستې،  شېدې،  کووا،  چکه،  پېروي او پنیر درنو هېوادوالو ته وړاندي کړي.
ختیځ لبنیاتو کارخوني په ۱۳۹۴ ه ش کال کې په کار پیل وکړ ، چي په لومړی سر کې د ورځې ۵۰۰ کیلو ګرامه شېدې پروسیس کولې،  خو اوس یې د پروسیس کچه ۳۵۰۰ کیلو ګرامه ده.  د ننګرهار  دکرنېاد او  مالدارۍ ریاست هڅه کوي ترڅو یې خپل اصلي ظرفیت ته ورسوي. په همدې موخه د ننګرهار د کرنې او مالدارۍ ریاست د همکارو مؤسسواو برنامو له لورې په مختلفو ولسواليو کې پر مالدارانو خوراکې توکې وویشل شوې او هم د ختیځ لبنیاتو ځینو ګروپونو ته د وښو د مېده کولو ماشینونه  ورکړل شوې.
یاده کارخونه  د ننګرهار  ۷ ولسواليو کامه،  کوزکونړ،  بټي کوټ،  سره رود،  چپرهار،  بهسود او غني خېلو له درې زره مالدارانو څخه شېدې راټولوي او په کارخونه کې پراسیس  کوي، چي له دې درکه مالدارانو ته ډېر عواید په لاس ورځي.
ځتیځ لبنیاتو کې ۲۲ تنو ته په مستقیم او ۲۳ نورو ته په غیر مستقیم ډول د کار زمینه هم برابره شوې ده.
په دې وروستیو کې له ګاونډیو هېوادونو بې کیفیته او ارزانه لبني توکي واردېږې، چي یاده کارخونه یې له ستونزو سره مخ کړېده او مسولېن یې له حکومت څخه د پاملرني غوښتنه کوي.
د کارخوني عامل مدیر خالد خان نعمت وایې که چېرته حکومت په بازار کې بې کېفیته لبني توکي بندي کړي او د ښار په مناسبو ځایونو کې ورته د غرفو د نصبولو اجازه ورکړي،  نو یاده کارخونه به ډېر  ژر پخپلو پښو ودرېږي او تازه،  صحي او پاک لبني توکي به لا ډېر  بازار ته وړاندې کړي.