د هلمند څړځایونو د بیارغونې هڅې؛ په پار یې د ټولنې غړي روزل کېږي

۱۵ چنګاښ ۱۴۰۰
د هلمند د کرنې، اوبولګولو او مالدارۍ ریاست وایي، چې په دې ولایت کې د څړځایونو د بیارغونې او پراختیا په پار هڅې پیل شوي دي، چې په ترڅ کې یې د دې ولایت د څړځایونو د تثبیت ترڅنګ  د بست کلا او کارېز سیمې د څړځایونو اړوندو ټولنو ۲۲۰ غړوته روزنه ورکول کېږي.
په دې درې ورځنۍ روزنیز پروګرام کې د ټولنو نویو غړو ته د اقلیمي بدلون، دباران اوبو کنترول، د څړځایونو بیارغونه او ریګي سیمو کې د نیالګیو روزنې په هکله زده کړې ورکول کېږي، ترڅو دوی د څړځایونو د ساتنې او بیارغونې په برخه کې لازمه پوهاوي ترلاسه او د څړځایونو ساتنه په سالم او منظم ډول وکړي.
د هلمند دکرنې رییس زلمی الکو وایي، چې د یاد ولایت د کرنې ریاست هلې ځلې کوي، ترڅو ددې ولایت په کچه هغه مالچر او څړځایونو چې د مالدارانو د مالونو څړځای لپاره ځانګړې شوي دي، بیا ورغوي.
ښاغلی الکو دغه راز وویل، چې د یادو څړځایونو په بیارغونې سره به د مالونو لپاره د څړمناسب چاپېریال رامنځته، د اوبو د زېرموساتنه کیږي او په ټوله کې د کوچیانو او مالدارانو په اقتصادي وضعیت کې په د پام وړ بدلون رامنځته شي.
هلمند چې، د مالدارۍ له پلوه غني ولایت دی، په دې وروستیو کې یې طبیعي ځنګلونه، مالچرونه او څړځایونه د غصب، تخریب او د طبیعي عواملو له امله په پراخه کچه زیانمن شوي دي.د هلمند دکرنې رییس وایي، چې ددې ولایت د طبیعي سرچینو د احیا، ساتنې او پراختیا په پار پراخ پروګرامونه په پام کې لري، چې په پلي کېدو سره یې یاد طبیعي سرچیني خوندي او د کوچیانو او مالدارانو د مالونو د خوراکې لپاره به چمتو شي