هلمند کې د پستې ۵۱۰ جریبه نوې بڼونه جوړېږي

۸چنګاښ ۱۴۰۰
د هلمند د کرنې، اوبولګولو او مالدارۍ ریاست وایي، چې د همکارو موسسو او خلکو په همکارۍ په دې وروستیو کې په دې ولایت کې د پستې سلګونه جریبه بڼونه جوړ شوي دي، چې ډېره ښه پایله یې هم ور کړې او ټاکل شوې، چې د پستې ۵۱۰ جریبه نوې بڼونه هم د روان کال په ترڅ کې جوړ شي.
په هلمند کې د پستې ۵۱۰ جریبه نوي بڼونه په داسې حال کې جوړیږي، چې تر دې وړاندې هم د هلمند د کرنې ریاست له خوا په دې ولایت کې د پستې سلګونه جریبه بڼونه جوړ شوې دي، چې د دغو بڼونو ښې پایلې نور کروندګر هم وهڅول، چې په خپلو ځمکو کې د پستې بڼونه جوړ کړي.
د هلمند د کرنې رییس زلمي الکو وایي، چې په دې ولایت کې د پستې د بڼونو په جوړولو کې د خصوصي سکټور ونډه د پام وړ دی.
ښاغلی الکو وایي: «له نېکه مرغه په دې وروستیو کې د پستې بڼونو جوړولو او ترویج په پار هلې ځلې کړندي شوي دي، دولتي قوریو کې دکرنې ریاست له خوا لس زره د پستې نیالګي روزل شوي دي او هغو بزګرانو ته به ورکړل شي، چې د پستې بنونو جوړولو ته لېوالتیا لري.»
د ښاغلي الکو په خبره په دې ولایت کې د خصوصي سکټور له خوا ۱۰۲ زره د پستې نیالګي روزل شوي دي،چې د دوی له خوا به پر ځمکوالو ووېشل شي.
د هلمند د کرنې رییس وایي، چې د هلمند ولایت د نوزاد او موسی کلا په ولسوالیو کې په دې وروستیو کالونو کې د پستې سوداګریزه بڼونه هم جوړ شوي دي او د روان کال په لړ کې ۱۳ زره د پستې ونې پیوند شوي دي.
دغه راز د هلمند دکرنې ریاست له خوا ددې ولایت ځمکوالو او بڼوالو ته د پستې نیالګیو پیوند، د ځمکې ډیزاین او نقشې او همداراز د پستې بڼونو جوړولو اړوند اړینې لارې چارې هم په عملي او نظري ډول ښودل شوي دي.
افغانستان په نړۍ کې د لوړ کیفیت پستې لرلو ویاړ لري او پسته د افغانستان د صادراتو یو مهم جز دی. دې ته په کتو د کرنې، اوبولګولو او مالدارۍ وزارت د افغانستان په هغو ولایتونو کې، چې د پستې د ونو لپاره مناسب اقلیم لري هرکال سلګونه جریبه دپستې نوې بڼونه جوړوي.