نورستان کې د نباتي ناروغیو او افتونو د کنټرول په پار ننداریزې کروندې جوړېږي

۲۶ غبرګولی ۱۴۰۰
د نورستان ولایت د کرنې، اوبولګولو او مالدارۍ ریاست چارواکي وایي، چې د فني او مسلکي کارکونکو پر مټ هڅې کوي تر څو د نباتي ناروغیو او افتونو کنټرول پر وخت سره وکړي.
یاد ریاست وایي، چې ددې ولایت بزګرو ته د نباتي ناروغیو او افتونو مخنیوي د عملي او نظري زده کړو په پار څلور ننداریزې کروندې جوړوي.
د نورستان ولایت دکرنې ریاست په وینا د نباتي ناروغیو او افاتو د کنټرول او پر وخت مخنیوي لپاره د مسلکي او فني کارکونکو پر مټ د مرکز پارون او نورګرام ولسوالی کې د نباتي ناروغیو هراړخیز مخنیوی په موخه څلور ننداریزې کروندې، چې په کې صنعتي نباتات او سابه شمال دي جوړېږي.
 په دغو ننداریزې کروندو کې بزګرانو ته د شته ناروغیو د مخنیوي او کنټرول په پار لازمې لارښوونې، میخانیکي او کیمیاوي لارې چارې او ترڅنګ  یې د ناروغیو د مدیریت او د کیمیاوي درملو زیانونه هم بزګرانو ته ښودل کېږي.
د نورستان ولایت د کرنې ریاست هڅه کوي تر څو پر وخت د کرنې د پراختیا لپاره بزګرانو ته د ناروغیو او افتونو د کنټرول او د نباتي ناروغیو او افاتو د مخنیوي او دهغوی د کچې د ټیټولو په موخه فني مشورې او سپارښتنې وکړي.