د سوېل ختیځ زون د دوو ولایتونو د کرنې ریاستونو يو شمېر کارکوونکو ته پنځه ورځنۍ روزنیز پروګرام پیل شو

۴ کب ۱۳۹۹
د پکتیا د کرنې، اوبولګولو او مالدارۍ رياست د غونډو په تالار کې د اړیکو دفتر په همکارۍ د سوېل ختیځ زون پکتیا او خوست د کرنې ریاستونو یو شمېر کارکوونکو ته د طبیعي سرچینو مدیریت په برخه کې پنځه ورځنۍ روزنیز پروګرام پیل شو.
د پکتیا د کرنې، اوبولګولو او مالدارۍ رییس انجنیر محمد دین مومند وويل، چې طبیعي سرچینې عامه شتمنۍ دي، ساتنه، پالنه او مدیریت يې د ټولو وګړو مسئولیت دی. ښاغلي مومند د طبیعي سرچینو د مدیریت یاد روزنیز پروګرام مهم وباله او له ګډونوالو یې وغوښتل، چې ترلاسه شوې زده کړې او تجربې له بزګرانو او خپلو همکارانو سره هم شریکې کړي.
د یادولو وړ ده، چې یاد روزنیز پروګرام د پنځو ورځو لپاره ده او ګډونوالو ته به د طبیعي سرچینو د مدیریت عملي او نظري لارې چارې وښودل شي.