هلمند کې د خټکیو د ناروغیو او افتونو د وقایې کمپاین پیل شو
۲۵ غویی ۱۳۹۸
د هلمند د کرنې، اوبولګولو او مالدارۍ ریاست له خوا په دې ولایت کې د خټکیو د ناروغیو او افتونو د وقایې کمپاین په لاره اچول شوې ده.
د هلمند ولایت د کرنې، اوبولګولو او مالدارۍ ریاست وایي، چې دغه کمپاین د هلمند ولایت په مرکز لښکرګاه او یوشمېر نورو ولسوالیو کې پلي کیږي. په دې کمپاین کې د فني کارکوونکو له خوا بزګرانو ته د خټکیو د ناروغیو او افتونو د وقایې هر اړخیزې لارې چارې په عملي او نظري ډول ښودل کیږي.
د هلمند د کرنې رییس زلمی الکو وویل، چې ددې کمپاین په لړ کې دهلمند د کرنې ریاست د فني او مسلکي کارکوونکو له خوا بزګرانو ته د خټکیو د ناروغیو او افتونو د وقایې مهمې او اغېزمنې لارې چارې په نظري اوعملي ډول ښودل کیږي. چې بیا وروسته دغه بزګران ددې کمپاین له لارې زده شوي لارې چارې په خپلو کروندو کې عملي کړي.
دهلمند دکرنې ریاست وایي دوی هلې ځلې کوي، چې بزګران د کیمیاوي درملو د استفادې پر زیانونو وپوهوي او ددغو خطرونو د مخنیوي په پآر د افتونو او ناروغیو مخه په میخانیکي لارو چارو ونیسي ترڅو له صحي او اقتصادي پلوه ګټور تمام شي.
