د زعفرانو د کروندو د پراختیا په پار هڅې: د بغلان یوشمېر ښځینه بزګران د زعفرانو د کرکېلي په برخه کې وروزل شول
۱۴ لړم ۱۳۹۹
د کرنې، اوبولګولو او مالدارۍ وزارت د زعفرانو د کروندو د پراختیا او ددې ارزښت لرونکي بوټې د کرکېلي د دودلو د هلو ځلو په دوام، داځل د بغلان د کرنې ریاست له خوا د مرکزي بغلان ولسوالی او د لوګریو په کلي کې ۳۰ زعفران کارو مېرمنو ته د زعفرانو د کرکېلي او حاصل ټولولو لارې چارې وښودل شوې.
د بغلان د کرنې ریاست وایي، چې بغلان دزعفرانو کرکېلي او تولید لپاره ښه مناسب اقلیم لري، او په دې ولایت کې د زعفرانو کرکېله د کمیت او کیفیت له پلوه ښه نتیجه ورکړې ده.د دوی په خبره که په دې ولایت کې د زعفرانو کرکېلي ته پاملرنه ډېر شي، یاد ولایت به د زعفرانو د سترو تولیدوونکو ولایتونو په ډله کې راشي.
په دې وروستیو کلونو کې د بغلان په ځینو سیمو کې د زعفرانو کرکېله ترویج شوې ده. د بغلان د کرنې ریاست هیله لري چې، ډېر ژر په دې ولایت کې د زعفرانو کرکېله او تولید زیات شي، په همدې موخه د بغلان د کرنې ریاست له خوا په دې برخه کې ښځینه او نارینوو بزګرانو سره هر اړخیزې مرستې او د دوی لپاره روزنیزې برنامې په لاره اچول کیږي.
