کندهار کې دکرنیزو محصولاتو مدیریت د پروژې چارې ډېر ژر بشپړیږي
۴ لړم ۱۳۹۹
د کندهار د کرنې، اوبولګولو او مالدارۍ ریاست وایي، چې په دې ولایت کې د کرنیزو محصولاتو مدیریت د اړوندو پروژو چارې څه باندې ۶۰ سلنه بشپړ شوي دي او پاتې چارې به یې هم ډېر ژر بشپړ او ګټې اخیستنې ته به وسپارل شي.
دکرنې وزارت د کرنیزو محصولاتو مدیریت د پروژې په اډانه کې د کندهار په ولایت کې یوزر او ۱۲ نوي کرنیزې پروژې پیل کړي، چې په کې ۹۱۳ ممیزخونې، د کچالو څلور زېرمتونونه او د مېوو ۵۲ صفر انرژۍ سړې خونې جوړول شامل دي، چې رغنیزې چارې یې څه باندې ۶۰سلنه بشپړ شوي دي. دغه راز ددې پروژې له لارې پر کروندګرو مېرمنو د سبو او مېوو ۴۳لمریز وچوونکي دستګاوې هم وېشل شوي دي. دیادو پروژو ټولیز لګښت نږدې ۵۱۴ میلیونه افغانۍ ده، چې لس سلنه یې د برخمن شوي کسانو او ۹۰ سلنه یې د کرنې وزارت له خوا ورکول کیږي.
