هلمند کې د څړځایونو د ثبت او تثبیت لړۍ روانه ده
۴ وږی ۱۳۹۹
د هلمند د کرنې، اوبولګولو او مالدارۍ ریاست وایي، چې د ولسمشر د فرمان پر اساس د یاد ریاست د تخنیکي ټیم له خوا په دې ولایت کې د څړځایونو د سیمو د ثبت او تثبیت لړۍ، چې مخکې پیل شوې وه ادامه لري. د دوی په خبره تر دې دمه د مرکز لښکرګاه ترڅنګ د ناوې او ګرمسیر په ولسوالیو کې څه باندې ۴۱ زره او ۳۹۹ هکټاره ځمکه د کدسټري نقشې پر اساس ثبت شوې، چې وروسته به یې د تصفیې لړۍ پیل شي.
د هلمند د کرنې رییس زلمي الکو وایي، چې تر دې دمه په مرکز او ولسوالیو کې څه باندې ۴۱ زره او ۳۹۹ هکټاره ځمکه د کدسټري نقشې پر اساس ثبت او تثبیت شوي، چې تر دې وروسته یې د تصفیې لړۍ پیلیږي.
ښاغلی الکو وایي، چې د دوی د پلان پر بنسټ د څړځایونو ځمکې به د املاکي او کډسټري نقشو له مخې تثبیت او دکرنې وزارت په ډیټابیس کې په ثبت او راجستر شي.
د ښاغلي الکو په خبره د کرنې ریاست ددې ولایت د طبیعي سرچینو د احیا، ساتنې او پراختیا په پار پراخ پروګرامونه په پام کې لري، چې په پلي کېدو سره یې یاد طبیعي سرچیني خوندي او د کوچیانو او مالدارانو د مالونو د خوراکې لپاره به چمتو شي.
