۱۶ زمری ۱۳۹۹

د کرنې وزارت سرپرست او د اوبولګولو او طبیعي سرچینو مرستیال حشمت‌الله غفوري، د خپل کار په دفتر کې د هلمند له والي محمدیاسین خان سره وکتل.

په دې لیدنه کې دواړو خواو د هلمند په ولایت کې پر لویو پروژو، د زمین‌داورکانال او د موسی کلا د اوبو د بند په هکله خبرې اترې وکړې.

په دې لیدنه کې د یادو پروژو د سروې پر پړاوونو او د وروستي ډیزاین پر چمتو کولو خبرې اترې وشوې.

د هلمند والي محمد یاسین خان په دې ولایت کې د کرنې وزارت له فعالیتونو څخه د مننې ترڅنګ، د کب روزنې د پروژو د پلي کېدو او د وړو شنوخونو د جوولو غوښتونکی شو، چې د کرنې وزارت د سرپرست د تأیید وړ وګرځېدل.

د کرنې وزارت سرپرست او د اوبولګولو او طبیعي سرچینو مرستیال حشمت‌الله غفوري دغه راز د هلمند له والي څخه وغوښت چې د کرنیزو محصولاتو مدیریت د پروژو د چټک او روڼ پلي کېدو په برخه کې دې همکاري وکړې، د هلمند والي په دې برخه کې د همکارۍ ژمنه وکړه.

په دې غونډه کې دغه راز د هلمند په ولایت کې پر راتلونکو برنامو بحث او په دې ولایت کې د مالدارۍ او غلودانو په برخه کې پر لاډېر تمرکز ټینګار وشوه.

دوی په دې لیدنه کې دواړو خواوو پر بزګرانو پر وخت د اصلاح شوي تخمونو په وېش هم ټینګار وکړل.