۲۹ غبرګولی ۱۳۹۹

د پکتیا د کرنې، اوبولګولو او مالدارۍ ریاست له خوا د یوې برنامې په ترڅ کې د وړو شخوند وهونکو څارویو د طاعون او دغه راز د څارویو د بروسلوز ناروغیو پر وړاندې د واکسینو کمپاین ددې ولایت د پټان له ولسوالۍ څخه پیل شو، چې په ترڅ کې یې ددې ولایت په مرکز او ولسوالیو کې وړې شخوند وهوونکي څاروي د طاعون او دغه راز د بروسلوز پر وړاندې واکسینیږي.

د پکتیا د کرنې ریاست په پام کې لري، چې ددې کمپاین په لړ کې د یاد ولایت کوچني شخوند وهوونکي څاروې د طاعون او د بروسلوز پر وړاندې واکسین کړي.

ددې کمپاین په پلي کولو سره د کرنې وزارت موخه داده، چې په دغو واکسینونو سره په دې ولایت کې د کوچنیو شخوند وهونکو څارویو د طاعون او دغه راز د بروسلوز ناروغۍ، چې په انسانانو او څارویو کې یوه ګډه ناروغي ده په بشپړه توګه له منځه ولاړ شي او هيڅ انسان او یا حیوان نور په دې ناروغۍ اخته نه شي.

بروسلوز يا حيواني محرقه د څارویو او انسانو تر منځ یوه ګډه باکتریايي ناروغي ده، چې له څارویو څخه انسانانو ته د خامو شیدو څښلو، له سقط شوي جنین او نورو پاتې شونو سره د تماس او د ککړو زراتو د تنفس له لارې لېږدي.

د بروسلوز واکسين یواځې ښځينه څارويو ته ورکول کېږي ځکه، چې هغوی د تکثر، توليد او تناسل وړتيا لري.