پکتیا کې ۳۳۰ بزګرانو ته د غوزانو او جلغوزې په برخه کې روزنه ورکول کیږي

۱۷ غویي ۱۳۹۹

د پکتیا د کرنې، اوبولګولو او مالدارۍ ریاست د ټولنې په کچه د ځمکې او ځنګلونو د تلپاتې مدیریت پروژې (FAO/GEF) په همکارۍ ددې ولایت د احمد اباد او سیدکرم ولسوالیو ۳۳۰ بزګرانو ته د غوزانو او جلغوزیو د نیالګیو د خړوبولو، څارنې اوساتنې په برخه کې تخنیکي روزنه ورکول کیږي، چې تر دې دمه ۲۰۰ بزګرانو ته روزنه ورکړل شوي دي او ۱۳۰ پاتې بزګران به هم په راتلونکو ورځو کې وروزل شي.

په ورته وخت کې د کرنې وزارت د ټولنې په کچه د ځمکې او ځنګلونو د تلپاتې مدیریت پروژې (FAO/GEF) له خوا د پکتیا د احمد اباد او سیدکرم په ولسوالیو ک د ۵۳ زره او ۱۰۰ نیالګیو په کېنولو سره د غوزانو او جلغوزې ۵۲۵ هکټاره هغه ځنګلونه چې له منځه تللي ول بېرته رغول شوي دي.

ددې ترڅنګ د یادې پروژې له خوا په احمد اباد ولسوالۍ کې د ځنګلونو د مدیریت اووه ټولنې هم جوړې شوي دي، چې هرې ټولنې ته پنځه کورني قوریې، چې ټول یې ۳۵ قوریې کیږي هم جوړې شوي دي.

پکتیا د افغانستان د جلغوزیو او چارمغزو د ځنګلونو له برخمنو ولايتونو څخه دي، چې د دغو ځنګلونو یوه برخه له منځه تللې، خو اوس د کرنې وزارت د جلغوزیو ځنګلونو د بيا رغونې هڅه کوي.