د هلمند د ناوې ولسوالۍ ریګستان سیمه کې ملخانو سره د مبارزې په پار کمپاین پیل شو
۱۵ غویی ۱۳۹۹
د هلمند دکرنې ریاست چارواکي وایي، وروسته تر هغه چې د هلمند ولایت د ناوې په ولسوالۍ کې د مضره ملخانو د راپیدا کېدو راپورونه ورکړل شول، ددې ولایت د کرنې ریاست سم د لاسه خپل فني ټیم، ماشینرۍ او درمل سیمې ته ولېږدول ترڅو یاد ملخان همالته له منځه یوسي او د تکثیر او زیان مخه یې ونیول شي.
د هلمند د کرنې ریاست سیمه ییز کارکوونکي وایي، چې په دې سیمه کې دومره ملخان شتون نه لري، چې د اندېښنې وړ وي.
د هلمند د کرنې ادارې لا له وړاندې د ملخانو د مخنیوي لپاره پر مختللي ماشینرۍ او درمل ته لاس رسی لري او اړونده کارکوونکو ته روزنه هم ور کړې ده.
د کرنې وزارت په ټول هېواد کې د بزګرانو د فصلونو د خوندي کولو او دوی ته د کرکېلي د نوي لارو چارو د ښودنې په موخه هر اړخیزې برنامې په لاره اچولي، ترڅو د بزګرانو محصولات خوندي او ډېر کړي او ترڅنګ یې د دوی عواید هم زیات شي.
