د ننګرهار ګوشتې ولسوالی کې د ځنګلونو د ساتنې او غیرقانوني قطعې د مخنیوي په موخه ناسته ترسره شوه
۱۸ تله ۱۴۰۵ هـ.ش
۲۷ رَبِیعُ الْثاني ۱۴۴۸ هـ.ق
د ننګرهار د کرنې، اوبو لګولو او مالدارۍ ریاست اړوند د ګوشتې ولسوالی د ځنګلونو مدیریت مسؤلینو د ګوشتې ولسوالی د دوړ خېلو او خوګا خېلو کلیو له قومي مشرانو او ځوانانو سره د ځنګلونو د ساتنې، د غیرقانوني ونو د قطعې د مخنیوي او د قدرتي سرچینو د خوندي ساتلو په موخه ناسته ترسره کړه.
په دې ناسته کې د ځنګلونو د دوامدارې څارنې، د ونو د غیرقانوني قطعې او د لرګیو د ناقانونه انتقال د مخنیوي په اړه لازمې سپارښتنې او مشورې شریکې شوې.
همدارنګه، سیمه‌ییزو خلکو ته د ځنګلونو د ارزښت، ګټو او د چاپېریال په ساتنه کې د هغوی د مهم رول په اړه لازم معلومات ورکړل شول.
قومي مشرانو د ځنګلونو د ساتنې په برخه کې خپله همکاري څرګنده کړه او ډاډ یې ورکړ چې د ځنګلونو د ساتنې او دوامدارې څارنې په برخه کې به له مسؤلینو سره ګډ کار کوي، څو دغه طبیعي شتمني له زیان او غیرقانوني استفادې څخه خوندي پاتې شي.
