د ننګرهار هسکه مېنه کې ۱۲۸ بېوزله کورنیو ته د ۳.۳ میلیونه افغانیو په ارزښت نسلي وزې ووېشل شوې
۳۱ زمری ۱۴۰۵ هـ.ش
۸ رَبِیعُ الْأَوَّل ۱۴۴۸ هـ.ق
د ننګرهار ولایت په هسکه مېنه ولسوالی کې د بېوزله او مستحقو کورنیو د اقتصادي پیاوړتیا په موخه، ۱۲۸ کورنیو ته د نږدې درې نیم میلیونه افغانیو په ارزښت نسلي وزې، حیواني خوراکه او د چنجیو ضد درمل ووېشل شول.
د ننګرهار د کرنې، اوبولګولو او مالدارۍ ریاست په هڅو، د ډنمارک د کډوالو نړۍوالې ادارې په تخنیکي همکارۍ او د اروپایي ټولنې او سویس د پراختیا او همکاریو ادارې په مالي ملاتړ، د یادې مرستې د وېش بهیر ترسره شو. د دې مرستې ټول مالي لګښت ۳ میلیونه، ۳۰۴ زره او ۹۸۰ افغانۍ ښودل شوی دی.
د ننګرهار د کرنې، اوبولګولو او مالدارۍ رییس مولوي عبدالستار محمد وویل، د دې مرستې موخه د بېوزله کورنیو د کورني اقتصاد پیاوړتیا، د عایداتي سرچینو رامنځته کول او د مالدارۍ له لارې د هغوی د اقتصادي وضعیت ښه کول دي.
نوموړي زیاته کړه، چې هرې ګټهاخیستونکې کورنۍ ته دوه نسلي وزې، ۵۰ کیلوګرامه حیواني خوراکه او دوه بوتله د چنجیو ضد درمل ورکړل شوي دي.
د ننګرهار دکرنې رییس په وینا، له ګټهاخیستونکو کورنیو سره د نسلي وزو د ساتنې او روزنې، مناسب خوراک، د درملو د سم استعمال، له وزو څخه د شیدو اخیستلو او د مالدارۍ په نورو اړوندو برخو کې لازمې روزنې هم ترسره شوې دي.
نوموړي وویل، چې د دې روزنو موخه دا ده چې کورنۍ وکولای شي له ورکړل شویو نسلي وزو څخه په سمه او اغېزمنه توګه ګټه واخلي، د څارویو د روغتیا ساتنه وکړي، د تولید کچه لوړه کړي او په پایله کې خپلې عایداتي سرچینې پیاوړې کړي.
د یادونې وړ ده، چې د ډنمارک د کډوالو نړۍواله اداره به په نږدې راتلونکي کې د ننګرهار په اچین او سپین غر ولسوالیو کې هم له سلګونو نورو بېوزله او مستحقو کورنیو سره د نسلي وزو د مرستې لړۍ ترسره کړي.
تمه ده، چې د دغو مرستو له لارې به د اړمنو کورنیو د مالدارۍ ظرفیت لوړ، د کورنیو عایداتي سرچینې پراخې او د هغوی د اقتصادي ځانبسیاینې زمینه لا پیاوړې شي.
