کونړ  کې ۶۵ بزګرانو ته د جوارو، لوبیا او شولو ننداریزو کروندو لپاره د کرنیزو توکو وېش

٢۲ زمری ۱۴۰۵ هـ.ش
٢۹ صَفَر المُظَفَّر ۱۴۴۸ هـ.ق
د کرنې، اوبو لګولو او مالدارۍ وزارت د پراختیايي بودیجې په چوکاټ کې، د کونړ ولایت د کرنې، اوبو لګولو او مالدارۍ ریاست د کرنیزو خدماتو آمریت د ترویج مدیریت له لوري ۶۵ بزګرانو ته د جوارو، لوبیا او شولو ننداریزو کروندو د جوړولو په موخه کیمیاوي سرې، د شولو د هرزه ګیاوو د کنټرول لپاره پوش ویډر او د کښت لپاره نغدي مرسته ووېشل شوه.
د یاد پروګرام له مخې، ۲۵ د جوارو، ۱۵ د لوبیا او ۲۵ د شولو بزګرانو ته کیمیاوي سرې ورکړل شوې. همدارنګه، د شولو بزګرانو ته د هرزه ګیاوو د کنټرول په موخه پوش ویډر او هر بزګر ته د کښت د لګښتونو لپاره ۱۰۰۰ افغانۍ نغدي مرسته ورکړل شوه.
د کیمیاوي سرو او نورو کرنیزو توکو د وېش لړۍ مراسم د کونړ ولایت د کرنې، اوبو لګولو او مالدارۍ رییس مولوي محمد سرور صادق، د کرنیزو چارو امر،  محمدالله فاروقي، د کرنې کارپوه سید حفيظ الله سیدی، د پلان عمومي مدیر موسی نورزی، د ترویج عمومي مدیر حیات الله هلال، د مستوفیت نماینده او د کرنې ریاست نورو تخنیکي او فني کارمندانو په حضور کې په رسمي ډول پیل شوه.
د یادو مسؤلینو په وینا، د ننداریزو کروندو له لارې به بزګران د نوې کرنیزې ټکنالوژۍ، اصلاح شویو تخمونو او معیاري کرنیزو میتودونو عملي تجربه ترلاسه کړي، چې په پایله کې به د جوارو، لوبیا او شولو حاصلات زیات او د سیمې کرنیز تولیدات به لا وده وکړي.
دوی زیاته کړه، چې دغه ننداریزې کروندې به د نورو بزګرانو لپاره هم د عملي زده‌کړو او تجربو غوره بېلګې وي او د عصري کرنې د دودولو او پراختیا په برخه کې به مهم رول ولوبوي.