د خوست باک ولسوالی کې د اقلیمي بدلونونو له امله د رامنځته شویو ستونزو اغېزو د ارزونې په موخه سروې ترسره شوه
۲ غبرګولی ۱۴۰۵ه.ش
۶ ذُو الحِجَّةِ ۱۴۴۷ه.ق
د خوست ولایت د کرنې، اوبو لګولو او مالدارۍ ریاست اړوند د باک ولسوالی د کرنیزو چارو عمومي مدیریت په همغږۍ او د «اکټېډ» مؤسسې په همکارۍ، د یادې ولسوالی په یو شمېر کلیو کې د اقلیمي بدلونونو له امله رامنځته شویو ستونزو د ارزونې په موخه سروې ترسره شوه.
یاده سروې د توتاک، ترکې، کوزه ترکې، سره تیږه، کوټکي، اوړنګ کڅ، باډرمیله او ورډاګانو په کلیو کې عملي شوه، چې پکې د بزګرانو او ځایي اوسېدونکو سره له نږدې لیدنې وشوې او د اقلیمي بدلونونو له امله رامنځته شوې ستونزې وڅېړل شوې.
د سروې موندنې ښيي چې وروستیو اقلیمي بدلونونو د سیمې پر کرنیزو فعالیتونو، حاصلاتو او قدرتي سرچینو منفي اغېزې کړي دي، چې په ځانګړې توګه د بارانونو کمښت، د تودوخې لوړېدل او د نباتي افتونو زیاتوالی یې مهمې بېلګې دي.
د یادې ارزونې موخه دا ده، چې د کرنیزو ستونزو د کمولو لپاره پر وخت او اغېزمنې حل لارې وموندل شي او له بزګرانو سره د تخنیکي مرستو او راتلونکو پروګرامونو د طرحې لپاره بنسټیز معلومات راټول شي.
د خوست د کرنې ریاست ژمن دی، چې د شته امکاناتو او د همکارو مؤسسو په همغږۍ به د اقلیمي بدلونونو پر وړاندې د بزګرانو د ملاتړ لپاره لازم ګامونه پورته کړي، څو د کرنې سکتور پیاوړی او د بزګرانو اقتصادي وضعیت ښه شي.
