ننګرهار کې د نیالګیو اېښودو کمپاین پیل شو

۱۶ سلواغه ۱۳۹۸
د ننګرهار د کرنې، اوبولګولو او مالدارۍ ریاست وایي، چې په دې ولایت کې د نیالګیواېښودو کمپاین پیل شوی دی، چې په ترڅ کې به یې ددې ولایت په بېلابېلو سیمو کې څه باندې دوه میلیونه مثمر او غیر مثمر نیالګي کېښودل شي.
د ننګرهار د کرنې ریاست سرپرست ډاکټر محمد ضمیر بهسودي وایي، چې سږ د ننګرهار د کرنې ریاست، کانال کرنیز شرکت، د نیالګیو روزنې ټولنې او ازادو قوریه لرونکو له خوا ۴۱۵ زره او ۳۲۵ مېوه لرونکي، یو میلیون او ۲۷۴ زره او ۹۳۴ بې مېوې نیالګي، ۳۱۰ زره او ۳۵۰ زینتي نیالګي، چې ټول یې «دوه میلیونه او ۶۰۶» نیالګي کیږي روزل شوي دي.
د ښآغلي بهسودي په خبره له دې ډلې ۲۰۱ زره او ۶۱۸ نیالګي یې د ننګرهار د کرنې، اوبولګولو او مالدارۍ ریاست په قوریو کې تولید شوي، چې د طرزالعمل او لایحې مطابق به یې دولتي ځایونو، عامه المنفعه سیمو، ښوونځیو او مدرسو ته د قید او جمع نه وروسته د ګډ پلاوي په شتون کې ووېشل شي.
نوموړی ډاډ څرګند کړ چې د نیالګیو تر وېشلو وروسته د ساتنې په موخه د ولایت مقام په مشرۍ د چاپېریال ساتنې او شاروالۍ ادارو سره په ګډه ځانګړی میکانیزم جوړ کړي ترڅو په سمه توګه د نیالګیو ساتنه وشي.