د کندهار ارغستان کې لسګونو بزګرانو ته د مۍ او جوارو اصلاح شوي تخمونه او کیمیاوي سرې ووېشل شوې
۱۹ غویی ۱۴۰۵ه.ش
۲۲ ذُو ٱلْقَعْدَةِ ۱۴۴۷ه.ق
د کندهار د کرنې، اوبو لګولو او مالدارۍ ریاست په هڅو، د ملګرو ملتونو دخوړو او کرنې ادارې «افاېاو» په مالي ملاتړ او د قندهار کډوالو مؤسسې « کېآراو» په تخنیکي همکارۍ د ارغستان په ولسوالی کې ۱۳۰ تنو بېوزلو او اړمنو بزګرانو ته د مۍ او جوارو اصلاح شوي تخمونه او کیمیاوي سرې ووېشل شوې.
د ارغستان ولسوالی د کرنې او مالدارۍ مسؤل مولوي اختر جان وویل، په دې لړۍ کې ۱۰۰ بزګرانو ته د جوارو اصلاح شوي تخمونه او سرې ورکړل شوې، چې هر بزګر ته ۱۲ کیلوګرامه تخم، ۵۰ کیلوګرامه توره سره او ۵۰ کیلوګرامه سپینه سره رسېدلې ده.
نوموړي زیاته کړه، سربېره پر دې ۳۰ نورو بزګرانو ته د مۍ اصلاح شوي تخمونه او سرې هم ووېشل شوې، چې هر بزګر ته ۸ کیلوګرامه د مۍ تخم، ۱۵ کیلوګرامه سپینه سره او ۱۵ کیلوګرامه توره سره ورکړل شوې ده.
د چارواکو په خبره، د دغې مرستې موخه د بزګرانو اقتصادي ملاتړ، له محدودو ځمکو څخه د زیات حاصل ترلاسه کول، د جوارو او میو کرکیلې پراخول او د اصلاح شویو تخمونو دودول دي.
د یادونې وړ ده، څو ورځې وړاندې هم د کندهار په میوند، ژړۍ، نېش او لوړ میوند ولسوالیو کې ۴۰۰ تنو بېوزلو بزګرانو ته د جوارو اصلاح شوي تخمونه او کیمیاوي سرې وېشل شوې وې.
