د خوست موساخلېلو ولسوالی کې یوشمېر بزګرانو ته شنې خونې جوړېږي
۱۳ غویی ۱۴۰۵ه.ش
۱۶ ذُو ٱلْقَعْدَةِ ۱۴۴۷ه.ق
د خوست ولایت د کرنې، اوبولګولو او مالدارۍ ریاست د ترویجي برنامو په دوام، د موساخېلو ولسوالی کې د شنو خونو د جوړولو لپاره د مستحقو بزګرانو د ټاکلو سروې په بریالیتوب سره بشپړه شوه.
یاده سروې د موساخېلو ولسوالی دکرنیزو خدمتونو مدیریت ، د ولسوالۍ د مقام، د اقتصاد ریاست او د اړوندو سیمهییزو ادارو د استازو له لوري په ګډه ترسره شوه، چې په ترڅ کې یې هغه بزګران وټاکل شول چې د شنو خونو د جوړولو لپاره لازم شرایط او وړتیاوې لري.
د خوست دکرنې ریاست چارواکي وایي، چې د دې پروګرام موخه د سبو د تولید زیاتوالی، د بزګرانو د اقتصادي وضعیت ښه والی او د عصري کرنیزو میتودونو دودول دي.
د موساخلېو ولسوالی د کرنې مسؤلینو د سروې پر مهال ټینګار وکړ چې ټاکل شوي بزګران به د شنو خونو له جوړېدو وروسته د اړینو تخنیکي روزنو او دوامداره څارنې تر پوښښ لاندې وي، ترڅو د پروژې اغېزمنتیا لوړه شي.
د یادو اتو شنو خونو جوړول به په سیمه کې د کرنیز تولید په پراختیا او د بازار لپاره د تازه سبو په برابرولو کې مهم رول ولوبوي.
د یادونې وړ ده، چې د خوست د کرنې ریاست له لوري د ورته پروژو د پراختیا هڅې روانې دي، څو بزګران له عصري کرنې سره اشنا او اقتصادي ثبات ته ورسېږي.
