زابل کې پر سلګونو بزګرانو د جوارو اصلاح شوي تخمونه او کیمیاوي سرې ووېشل شوې
۹ غویی ۱۴۰۵ه.ش
۱۲ ذُو ٱلْقَعْدَةِ ۱۴۴۷ه.ق
د زابل ولایت د کرنې، اوبو لګولو او مالدارۍ ریاست په همغږۍ او د (افجياې) مؤسسې په تخنیکی همکارۍ ددې ولایت ۵۴۵ مستحقو بزګرانو ته د جوارو اصلاح شوي تخمونه او کیمیاوي سرې ووېشل شوې.
ددې پروسې په ترڅ کې هر بزګر ته ۱۲ کیلوګرامه د جوارو اصلاح شوي تخم، ۵۰ کیلوګرامه توره سره او ۵۰ کیلوګرامه سپین (یوریا) سره وېشل شوي دي.
د یادې مرستې مستحقین د یوې ګډې کمېټې له لوري په شفافه توګه ټاکل شوي وو او د وېش بهیر هم د همدې کمېټې په حضور کې ترسره کېږي.
بزګرانو د دغو مرستو له ترلاسه کولو خوښي څرګنده کړه او ویې ویل، چې دا ډول ملاتړونه د دوی د حاصلاتو په زیاتوالي او اقتصادي وضعیت په ښه کېدو کې مهم رول لري. هغوی د کرنې ریاست او همکارو ادارو څخه مننه وکړه او غوښتنه یې وکړه، چې په راتلونکې کې دې د بزګرانو، بڼوالو او مالدارانو ملاتړ لا پراخ او دوامداره شي.
د زابل د کرنې ریاست چارواکي وایي، چې دا ډول پروګرامونه د کرنیزو تولیداتو د زیاتوالي، د خوړو خوندیتوب او د بزګرانو د اقتصادي پیاوړتیا لپاره عملي کېږي او هڅه کوي، چې ورته مرستې نورو سیمو ته هم وغځوي.
