د پکتیکا جاني خېلو کې بزګرانو ته د بادامو بڼونه او لمریزې برېښنا ورکړه؛ د کوکنارو د بدیل پروګرام مهم ګام
۳۱ وری ۱۴۰۵ه.ش
۳ ذُو ٱلْقَعْدَةِ ۱۴۴۷ه.ق
د کرنې، اوبو لګولو او مالدارۍ وزارت له خوا د کوکنارو د کښت د بدیل پروګرام په چوکاټ کې د پکتیا ولایت د جاني خېلو ولسوالی کې ۵۶ تنو بزګرانو ته د بادامو یو جریب بڼونه د څاڅکي اوبو لګولو په سیسټم جوړ شوي دي. دغه پروګرام د دې لپاره پلي شوی چې د کوکنارو د کښت مخه ونیول شي، د بڼوالۍ سکتور پراخ شي او د بزګرانو اقتصادي وضعیت پیاوړی شي.
د یادې پروژې د پاتې برخې د تطبیق په لړ کې، همدغو ۵۶ بزګرانو ته د څاڅکي اوبو لګولو سیستمونو د فعال ساتلو لپاره پاتې لمریزې تختې ووېشل شوې، چې هر بزګر ته دوه دانې ورکړل شوې.
د پکتیکا دکرنې ریاست چارواکي وایي، د لمریزو تختو په مرسته به بزګران وکولای شي خپل د اوبو لګولو سیستمونه په منظم او دوامدار ډول فعال وساتي، د اوبو له ضایع کېدو مخنیوی وکړي او د بادامو بڼونو حاصلات زیات کړي. دغه اقدام نه یوازې د عصري کرنې د ترویج لامل ګرځي، بلکې د چاپېریال ساتنې او د انرژۍ د بدیلو سرچینو کارولو ته هم وده ورکوي.
د یاد پروګرام په عملي کېدو سره تمه ده، چې د قانوني کرنې وده چټکه شي، د بزګرانو عواید لوړ شي او په سیمه کې د کوکنارو کښت په محسوس ډول راکم شي، چې دا به د دوامدار اقتصادي پرمختګ او ټولنیز ثبات لپاره یو مهم ګام وي.
