دهلمند بشران سیمه کې بزګرانو ته د نباتي افتونو د مخنیوي په اړه روزنه ورکړل شوه
۲۹ وری ۱۴۰۵ه.ش
۱ ذُو ٱلْقَعْدَةِ ۱۴۴۷ه.ق
د هلمند دکرنې، اوبولګولو او مالدارۍ ریاست اړوند د کرنیزو چارو امریت د بوټو ساتنې او قرنطین لوی مدیریت کارکوونکو د بشران سیمه کې کروندګرو او بڼوالو ته د نباتي افتونو د مخنیوي په اړه روزنه ورکړه.
په دې روزنیز پروګرام کې بزګرانو ته د غنمو کفشک حشرې، نباتي کنو، نباتي شپږیو، د ریښې خوړونکي چینجي، د مېوو مچ او نورو افتونو د مخنیوي میخانیکي او کیمیاوي لارې چارې وروښودل شوې.
مسلکي کارکوونکو ټینګار وکړ چې بزګران دې تر ډېره د افتونو د کنټرول لپاره میخانیکي طریقې وکاروي او د کیمیاوي درملو له بېځایه او زیات استعمال څخه دې ډډه وکړي، ځکه دا کار د چاپېریال د ککړتیا ترڅنګ د انسان او حیوان لپاره هم زیانمن تمامېږي.
همدارنګه بزګرانو ته سپارښتنه وشوه، چې د وقایوي درملنې ته لومړیتوب ورکړي، هرزه واښه له منځه یوسي، مقاوم تخمونه وکاروي، پر وخت حیواني او کیمیاوي سرې استعمال کړي او منظمه اوبه لګونه ترسره کړي، څو ښه، باکیفیته او زیات حاصلات ترلاسه او خپل اقتصادي وضعیت ښه کړي.
