د ننګرهار مومندرې ولسوالی کې ۶۳۰ کورنیو ته مرستې او د کانالونو رغنیزې چارې بشپړې شوې
۲۶ کب ۱۴۰۴ه.ش
۲۸ رَمَضانُ المُبارَک ۱۴۴۷ه.ق
د ننګرهار د کرنې، اوبولګولو او مالدارۍ ریاست په هڅو، د ګډې هڅې ملي بشري مؤسسې په تخنیکي همکارۍ او د «جیایان» مؤسسې په مالي لګښت، د مومندرې ولسوالی کې د وچکالۍ له امله زیانمنو شویو ۶۳۰ کورنیو ته خوراکي او غیرخوراکي توکي ووېشل شول.
د ننګرهار د کرنې، اوبولګولو او مالدارۍ رییس، مولوي عبدالستار محمد وویل، چې په یاده ولسوالی کې ۶۳۰ مستحقو کورنیو ته، چې پکې مشروط او غیرمشروط ګټهاخیستونکي شامل وو، مرستې رسېدلې دي. نوموړي زیاته کړه، د کار په بدل کې د خوړو پروګرام له مخې کارګرو د ۸.۵ کیلومتره کانالونو تنظیم او پاککاري ترسره کړې او همدارنګه د ۲۹۰ مترو په اوږدوالي د اوبو لګولو کانالونو ته استنادي دېوالونه جوړ شوي دي، چې له امله یې سلګونه جریبه کرنیزې ځمکې ته د اوبو رسولو اسانتیا برابره شوې ده.
د یاد ریاست د معلوماتو له مخې، په وېشل شوو خوراکي بستو کې ۱۵۰ کیلو اوړه، ۲۰ لیټره غوړي، ۵۰ کیلو وریجې، ۲۰ کیلو بوره، ۲ کیلو شین چای، ۱۴ کیلو لوبیا، ۱۳ کیلو مۍ او ۲ کیلو مالګه شامله وه، چې مستحقو کورنیو ته ورکړل شوې.
د ننګرهار ولایت په وروستیو کلونو کې د پرلهپسې وچکالیو له امله د کرنې او مالدارۍ په برخه کې له جدي ستونزو سره مخ شوی، چې له امله یې ګڼ شمېر بزګران او کلیوال له اقتصادي فشارونو سره مخ شوي دي. په همدې موخه، د کرنې ریاست او همکارو مؤسسو له لوري د بشري مرستو ترڅنګ د بنسټیزو پروژو پلي کول، لکه د اوبو لګولو کانالونو رغول او پاکول، د دې لامل ګرځي چې هم لنډمهاله اړتیاوې پوره شي او هم د کرنیز تولید د دوام لپاره زمینه برابره شي.
