د خوست موساخېلو کې د واټرشیډونو د جوړولو په پار پر کاریګرو توکي ووېشل شول
۲۶ کب ۱۴۰۴ه.ش
۲۸ رَمَضانُ المُبارَک ۱۴۴۷ه.ق
د خوست ولایت د کرنې، اوبو لګولو او مالدارۍ ریاست په چوکاټ کې، د موساخېلو ولسوالی د کرنیزو چارو عمومي مدیریت تر نظارت لاندې، د ملګرو ملتونو پراختیايي پروګرام «یواندډيپي» مالي ملاتړ او د «ویرو» مؤسسې په همکارۍ، د یادې ولسوالی د څندي کلي ۱۸ تنو کاریګرو ته د ګوړیو کېندلو او واټرشیډونو جوړولو په موخه نهه قلمه توکي ووېشل شول.
د وېشل شوو توکو په لړ کې بېلچه، کلنګ، جاکټ، بوټونه، موزې، دستکشې، ماسکونه، خولۍ او عینکې شاملې وې، چې د کاریګرو د خوندیتوب او د کار د اسانتیا لپاره برابرې شوې دي.
د چارواکو په وینا، د دغو توکو وېش د دې لپاره ترسره شوی، څو کاریګرو ته لازمې اسانتیاوې برابرې شي، د واټرشیډونو جوړولو چارې په معیاري او خوندي ډول پر مخ ولاړې شي او همدارنګه د سیمې د اوبو مدیریت ښه شي، د خاورې ساتنه پیاوړې شي او کرنیز فعالیتونه لا زیات پرمختګ ومومي.
د یادونې وړ ده، چې د دې پروګرام له مخې هر کاریګر ته د روزنې او کار په بدل کې ۳۶۰ افغانۍ هم ټاکل شوې دي، څو د هغوی اقتصادي ملاتړ هم وشي.
