لغمان کې د کرنې او مالدارۍ د پراختیا په موخه سکتوري غونډه ترسره شوه
۲۰ کب ۱۴۰۴ه.ش
۲۲ رَمَضانُ المُبارَک ۱۴۴۷ه.ق
د لغمان د کرنې، اوبولګولو او مالدارۍ ریاست له لوري په دې ولایت کې د هغو سکتوري ادارو او مؤسسو د استازو په ګډون سکتوري غونډه ترسره شوه، چې د کرنې او مالدارۍ په برخه کې فعالیت لري.
یاده غونډه د لغمان دکرنې رییس مولوي سلیمان ایمن په مشرۍ جوړه شوې وه، چې پکې د سکتوري ادارو ترڅنګ د کرنې، اوبولګولو او مالدارۍ ریاست آمرینو، د افغانستان نابینایانو مؤسسې، اکشن اېډ، رحمانزي کرنیز شرکت، «انسياراو» او ایسو مؤسسو استازو او یو شمېر فارم لرونکو ګډون کړی و.
د غونډې په پیل کې مولوي سلیمان ایمن د همکارو برنامو د تېرو کړنو راپورونه واورېدل او د راتلونکو طرحو په اړه معلومات ترلاسه کړل. وروسته یې د همکارو مؤسسو مسؤلینو ته سپارښتنه وکړه، چې ټولې پروژې دې د فعالیت له پیل څخه تر پای پورې د یاد ریاست سره په همغږۍ پلي شي. همدارنګه ټینګار وشو، چې لیرې پرتو سیمو، په ځانګړې توګه د فراشغان نوې تأسیسه ولسوالی ته دې د کرنې او مالدارۍ په برخه کې ګټورې پروژې پلي شي، څو د خدمتونو عادلانه وېش، متوازنه پراختیا او شفافیت تأمین شي.
د لغمان د کرنې رییس همداراز د مؤسسو له استازو وغوښتل، چې د پروژو د مستفیدینو لېستونه دې د لارښوونو سره سم پر وخت له دغه ریاست سره شریک کړي. نوموړي همدارنګه وویل، چې د کرنیزو او مالدارۍ تولیداتو د نندارتون د جوړېدو په موخه دې مؤسسې له بزګرانو او مالدارانو سره د غرفو د نیولو په برخه کې مالي همکاري وکړي، څو د هغوی تولیدات نندارې ته وړاندې او بازارموندنه یې وشي.
وروسته په غونډه کې د همکارو برنامو مسؤلینو خپلې کاري ستونزې شریکې کړې، چې د حل په موخه پرې لازم تصمیمونه ونیول شول.
د یادونې وړ ده، چې په ټولو ولایتونو کې د کرنې سکتوري غونډه هره میاشت یو ځل د اړوندو ادارو او مؤسسو ترمنځ د لا ښې همغږۍ رامنځته کولو په موخه ترسره کېږي.
