د ننګرهار په دوو ولسوالیو کې ۲۰۰ هېوادوالو ته د کار زمینه برابره شوه
۲ کب ۱۴۰۴ه.ش
۴ رَمَضانُ المُبارَک ۱۴۴۷ه.ق
د ننګرهار د کرنې، اوبو لګولو او مالدارۍ ریاست په هڅو او د بشري خیریه مؤسسې «اواچ‌ډبلیو» په مرسته د ننګرهار په نازیان او اچین ولسوالیو کې د کانالونو صفا کولو په برخه کې دسیمې ٢٠٠ تنو هېوادوالو ته د کار زمینه برابره شوه.
د ننګرهار د کرنې، اوبو لګولو او مالدارۍ رییس مولوي عبدالستار محمد وویل، چې د اچین ولسوالی پېښې خوړ غني کلا کانال او د نازیانو ولسوالی تپي کلي کانال کې ٢٠٠ تنو ته د شل ورځو لپاره د کار زمینه برابره شوه.
ښاغلي محمد زیاته کړه، چې د یادو کارګرانو په مرسته به په دواړو کانالونو کې څه باندې یوولس کیلو متره کانالونو صفایي ترسره شي، چې ددې سره به ٢٠٠٠ جریبه ځمکه خړوبه او په منظم دول ورته اوبه ورسېږي. د ننګرهار د کرنې رییس وایي د کانالونو پاکولو موخه د اوبو ښه مدیریت او ضایعاتو مخنیوي دي.
وړاندې تردې هم یادې مؤسسې د کانالونو پاکولو سربېره د کرنې په برخه کې د بزګرانو سره په بېلابېلو برخو کې مرستي ترسره کړي.
