د ننګرهار والي فارم جدید نیالګیو روزنځاي څخه لیدنه وکړه
۲۲ سلواغه ۱۴۰۴ه.ش
۲۳ شَعبان المُعَظّم ۱۴۴۷ه.ق
د ننګرهار والي ملا محمد نعیم اخند چې د ننګرهار د کرنې رییس مولوي عبدالستار اخندزاده او ددې ریاست د قدرتي زېرمو امر قاري کاهون عبدالرحمن اتل یي ملتیا کوله دننګرهار د کرنې ریاست د فارم جدید نیالګیو روزنځای او نیالګیو څخه لیدنه وکړه. ددې لیدنې په ترڅ کې د ننګرهار د کرنې رییس مولوي عبدالستار اخندزاده د ننګرهار والي ته د نیالګیو روزنې او فارمونو اړونده برخو کې معلومات وړاندې کړل.
نوموړي وویل، چې سږ کال د ننګرهار د کرنې ریاست د (غلام حیدرخان، فارم جدید او مملي باغ ) د نیالګیو په روزنځایو کې ٢٠٠ زره مېوه لرونکي، بېمېوې او زینتي بوټي روزل شوي او کرلو ته چمتو دي او د کرنې وزارت د کړنلارې مطابق یي د ننګرهار ولسونو او بېلابېلو اداراتو ته په واک کې ورکول کېږي.
د ننګرهار والي حاجي ملا محمد نعیم اخند د نیالګیو روزنځایونو کې پر روزل شوو نیالګیو خوښي وښوده او د نیالګیو پر کرلو او د نورو نیالګیو روزلو او پاللو ټینګار وکړ.
دننګرهار والي د نیالګیو روزنځایونو د پیاوړتیا په برخه کې دپوره همکارۍ ډاډ هم ورکړ.
