د کرنې وزارت د پلان لوی رییس په کونړ کې له پراختیایي پروژو څخه لیدنه وکړه
۱۵ سلواغه ۱۴۰۴ه.ش
۱۶ شَعبان المُعَظّم ۱۴۴۷ه.ق
د کرنې، اوبو لګولو او مالدارۍ وزارت د پلان او د برنامو د همغږۍ لوی رییس مولوي عبدالغفور، د نظارت او ارزیابۍ رییس مولوی امان الله شاهي او مرسره مل پلاوي په داسې حال کې، چې د کونړ د کرنې ریاست چارواکو او د ډنمارک د کډوالو کمېټې «ډيارسي» د ختیځ زون استازی عبدالمنیر رحمانزي او او یوشمېر نورو چارواکو یې ملتیا کوله دکونړ په وټه پور ولسوالی کې د «ډيارسي» کمېټې د «ایزي لایف» له لارې پلي شویو پروژو څخه لیدنه وکړه.
په یاده پروژه کې د کونړ ولایت په درېیو ولسوالیو (ناړۍ، شیګل او وټه پور) ولسوالیو کې د اوبو مدیریت (د اوبو زېرمو، ټرینچونو، کانالونو، نیالګیو کښت)، برخې او همدارنګه د کوچنیو کاروبارونو د تقویت او مالي ملاتړ پروګرامونو ترسره شوي؛ چې په یادو ولسوالیو کې یې په سلګونو جریبه للمي ځمکه په اوبیزو ځمکو بدلې کړي او همدارنګه د خلکو لپاره کورني اقتصاد پیاوړتیا رامنځته شوې ده.
د کرنې وزارت د پلان لوی رییس مولوی عبدالغفور د یاد دفتر ټولې هڅې او فعالیتونه وستایل او خوښي یې څرګنده کړه، چې د کونړ ولسونو لپاره «ډيارسي» داسې بنسټیز او پراختیایي پروژې تطبیق کړي، چې په اساس یې عامو ولسونو ته خیر رسیدلی دی او د ژوند معیشت یې ورسره ښه شوی دی.
د یاد سفر په ترڅ کې د کرنې وزارت د نظارت او ارزونې ریاست مسلکي انجینرانو لخوا کارونه مثبت وارزول شول او په ځينو برخو کې یې د لا نورو فعالیتونو ترسره کیدو غوښتنه وکړه.
د «ډيارسي» د ختیځ زون استازی عبدالمنیر رحمانزي وویل، چې د دې پروژې په تطبیق سره په یادو سیمو کې په سلګونو جریبه للمي ځمکې تر اوبو لګولو لاندې راغلي او په پلي کېدلو سره یې د کونړ ولسونه ډېر خوښ دي، ځکه چې د کرنیزو تولیداتو د کښت تر څنګ، د کار نوې زمینې ورته برابر شوي او د سیمه ییزو خلکو کورني اقتصاد ورسره یو اندازه ښه شوی او په راتلونکې کې په کونړ ولایت کې د ورته نورو پروژو د پلي کولو ژمنه وکړه.
