د کندهار یوشمېر ولسوالیو کې د ژمني تېلو وقایوکي کمپاین پیل شو
۱۵ سلواغه ۱۴۰۴ه.ش
۱۶ شَعبان المُعَظّم ۱۴۴۷ه.ق
د کرنې، اوبو لګولو او مالدارۍ وزارت په لارښونه، د کندهار ریاست تر رهبرۍ لاندې، د کرنیزو چارو آمریت اړوند دبوټو ژغورني او قرنطین مدیریت د مسلکي انجنیرانو له لوري د کندهار په دامان، ارغنداب او شاولیکوټ ولسوالیو کې د ژمي موسم له را رسېدو سره سم د ژمني تېلو ساحوي وقایوي کمپاین پیل شو، چې دا مهال یې چارې روانې دي.
د کندهار دکرنې ریاست د بوټو ژغورني او قرنطین عمومي مدیر انجنیر ذبیحالله زیارمل وایي، په دې کمپاین کې کروندګرو ته د ژمني تېلو د جوړولو، استعمال او اغېزمنتیا په اړه عملي او نظري روزنه ورکول کېږي، او ترڅنګ یې کروندګرو ته د افتونو د هر اړخیز کنټرول«ایپيام» لارې چارې او میتودونه هم ښودل کېږي.
نوموړی زیاتوي، چې د دې وقایوي کمپاین پر مهال کروندګرو ته په سیمه کې د بوټو ناروغیو پېژندنه، د مخنیوي لارې چارې او وقایوي تدابیر په عملي ډول تشریح کېږي.
په ورته وخت کې د یادو ولسوالیو کروندګر د دغو روزنیزو پروګرامونو څخه خوښي څرګندوي او د کندهار د کرنې ریاست څخه مننه کوي، چې ورته دا ډول ګټوري روزنې برابروي.
د یادونې وړ ده، چې دا ډول روزنې د کرنې سکتور د ودې او پراختیا، د بزګرانو د ملاتړ او د وقایوي تدابیرو د پلي کولو په موخه ترسره کېږي، ترڅو کروندګر په مسلکي ډول وروزل شي او وکولای شي د بڼوالۍ او کرنیزو ځمکو چارې په ښه ډول پر مخ یوسي.
