د هلمند موسی قلعه ولسوالی کې ۵۰ مالدارانو ته د مالدارۍ اړوند تجهیزات ووېشل شول
۲۱مرغومې ۱۴۰۴ه.ش
۲۱ رَجَب المُرَجَّب ۱۴۴۷ه.ق
د هلمند دکرنې، اوبولګولو او مالدارۍ ریاست د موسی قلعه ولسوالی د کرنیز ترویج عمومي مدیریت اړوند د مالدارۍ د ترویج او حیواني روغتیا مدیریت او د همکارې موسسې (ډاکار) په همکارۍ ۵۰ تنه مالدارانو ته د مالدارۍ اړوند بېلابېل سامانآلات ووېشل شول، څو د هغوی د تولید کچه لوړه او د حیواني روغتیا وضعیت ښه شي.
د یادو تجهیزاتو د وېش پر مهال د ترویج مدیریت د حیواني روغتیا مدیر، د ولسوالی استازي او یو شمېر نورو مسؤلینو ګډون درلود. مسؤولینو وویل، چې دا مرسته د مالدارانو د ملاتړ او د هغوی د تولیداتو د زیاتوالي په موخه تر سره شوې ده.
د معلوماتو له مخې، هر مالدار ته یوه برقي غړکه، یو مرتبان، یو سطل، یوه کاسه، یوه جوړه موزې، د غواوو لپاره یو دانه کریم، د شېدو د اندازې کولو اله، څلور پاکټه د میکروب ضد صابون، دوه بوتله الکولي درمل او یوه جالۍ ووېشل شول.
له بلې خوا، د مالدارۍ د ترویج او حیواني روغتیا مدیریت مسؤلینو مالدارانو ته سپارښتنه وکړه، چې یاد ورکړل شوي توکي دې د مالدارۍ د چارو د سمون او د تولیداتو د زیاتوالي په موخه په سمه توګه وکاروي.
دوی زیاته کړه، چې دا ډول مرستې نه یوازې د مالدارانو کاري اسانتیاوې زیاتوي، بلکې د حیواني محصولاتو د کیفیت او کمیت په لوړولو کې هم مهم رول لري.
