د غزني د کرنې رییس او د افغانستان راتلونکو نسلونو موسسې ترمنځ ګډه مشورتي غونډه وشوه
۶ مرغومې ۱۴۰۴ه.ش
۶ رَجَب المُرَجَّب ۱۴۴۷ه.ق
د غزني ولایت د کرنې، اوبو لګولو او مالدارۍ رییس مولوي محمد اسماعیل شکیب د یاد ریاست په مقر کې د افغانستان راتلونکو نسلونو موسسې له مسؤلینو سره ګډه مشورتي غونډه ترسره کړه، چې پکې د راتلونکو پرمختیايي پروژو، همغږۍ او شفاف تطبیق پر څرنګوالي خبرې وشوې.
یاده غونډه د غزني دکرنې رییس مولوي محمد اسماعیل شکیب لهخوا د موسسې استازو ته د ښه راغلاست په ویلو پیل شوه. نوموړي ټینګار وکړ چې ټولې طرحې او فعالیتونه باید د لاسلیک شوي تفاهملیک مطابق، په بشپړ شفافیت او د نافذه قوانینو پر بنسټ تطبیق شي.
په غونډه کې د افغانستان راتلونکو نسلونو موسسې مسؤل محمد یعقوب کلزی د موسسې د پلان شویو پروژو او هدفونو په اړه معلومات وړاندې کړل. د هغه په وینا، یادې موسسې پلان لري چې د بېبضاعته کورنیو د اقتصادي پیاوړتیا په موخه د چرګانو کوچني فارمونه جوړ کړي، شنې خونې تأسیس کړي، د ښځو او کورنیو لپاره کوچني کسبونه پیل کړي او له اړمنو کسانو سره مالي او تخنیکي ملاتړ برابر کړي.
د غونډې په پای کې دواړو لوریو ژمنه وکړه چې د یادو پروژو د اغېزمن تطبیق لپاره به نږدې همغږي، تخنیکي ملاتړ او دوامداره همکاري ولري، څو اړمنو خلکو ته عملي او مثمر خدمتونه وړاندې شي.
