هلمند کې د بېکیفیته شاتو د مخنیوي په تړاو ګډه ناسته تر سره شوه
۹ لیندۍ ۱۴۰۴ هـ.ش
۹ جُمَادَى الثاني ۱۴۴۷ هـ.ق
د هلمند ولایت د کرنې، اوبولګولو او مالدارۍ ریاست اړوند د مالدارۍ او حیواني روغتیا امریت امر حافظ هدایت الله هدایت او اړونده مدیرانو، د شاتو مچیو روزونکو او د شاتو د اتحادیې له رییس، مرستیالانو او غړو سره غونډه ترسره کړه.
په ناسته کې په بازارونو کې د بېکیفیته او تقلبي شاتو د مخنیوي، او همدارنګه هغه وارداتي شاتو د څارنې په اړه هر اړخیز بحث وشو چې د تولید منبع یې روښانه نه وي.
د مالدارۍ امریت آمر له اتحادیې څخه د جدي همکارۍ غوښتنه وکړه، څو د دې ستونزو د مخنیوي په برخه کې لازم اقدامات ترسره شي.
په ګډه پرېکړه وشوه، چې د اتحادیې او د مالدارۍ امریت په همغږۍ به د بازارونو له بېکیفیته شاتو څخه مراقبت ترسره کېږي.
همدارنګه ټولنې ته ۴۵ ورځې وخت ورکړل شو ترڅو خپل ټول تولید شوي شات د مشخصو معیارونو سره برابر او له کیفیت څخه یې د آمریت مسؤلینو ته ډاډ ورکړي.
