غزني کې دبدیل معیشت او د کوکنارو او نورو مخدره توکو تولیدونکوبوټو دزیانونو په اړه پوهاوی غونډه ترسره شوه 

۱۲ لړم ۱۴۰۴ هـ.ش
۱۲ جُمَادَى الأول ۱۴۴۷ هـ.ق
د غزني ولایت د کرنې، اوبولګولو او مالدارۍ ریاست له لوري د «بدیل معیشت او د کوکنارو د زیانونو په اړه د پوهاوي» تر عنوان لاندې یو مهم پوهاوي پروګرام ترسره شو، چې پکې د غزني ولایت ګڼ شمېر بزګرانو او سیمه‌والو ګډون کړی و.
په دې غونډه کې د کرنې رییس مولوي محمد اسماعیل شکیب ګډونوالو ته خبرې وکړې او ویې ویل، چې د کوکنارو کر باید پای ومومي، ځکه دا عمل ټولنې ته جدي زیانونه رسوي. نوموړي زیاته کړه، چې د غونډې موخه د بزګرانو پوهاوی لوړول او هغوی د حلالو، ګټورو بدیل کښتونو پر لور هڅول دي.
ښاغلي شکیب همداراز وویل، چې د کرنې وزارت د بدیل معیشت لپاره ګڼ شمېر طرحې لري او د مېوه لرونکو بڼونو پروژې به ډېر ژر نه یوازې په غزني، بلکې په نورو ولایتونو کې هم پلي شي، تر څو خلکو ته د مشروع عوایدو زمینه برابره شي.
په همدې مهال، یو شمېر ګډون‌والو بزګرانو د کرنې وزارت دغه نوښت وستایه او دا یې د کوکنارو د کښت د مخنیوي په برخه کې ارزښتناک ګام وباله. دوی له دولته وغوښتل چې یوازې بدیل معیشت ته بسنه ونه کړي، بلکې د کرنیزو بندونو او اوبخور شبکو له لارې د اوبو د مدیریت لپاره هم عملي ګامونه واخلي.
یادونه باید وشي، چې غزني یو له هغو ولایتونو څخه دی، چې ډېری خلک یې په کرنه او مالدارۍ بوخت دي، او کرنه د دې ولایت د اقتصاد یوه مهمه ستنه ګڼل کېږي.