د کندهار تختهپل کې نږدې پنځه زره کوچني څاروي د طاعون ناروغۍ پر ضد وقایوي واکسین شول
۳ لړم ۱۴۰۴ هـ.ش
۳ جُمَادَى الأول ۱۴۴۷ هـ.ق
د کرنې، اوبولګولو او مالدارۍ ریاست په هڅو او د ملګرو ملتونو د خوړو او کرنې ادارې «اف.اې.او» په مالي ملاتړ، د کندهار د تختهپل ولسوالی ۴ زره ۸۰۰ کوچني څاروي د طاعون ناروغۍ د مخنیوي په موخه وقایوي واکسین شول.
یاد واکسین د تختهپل ولسوالی د مسلکي پاراوټرنرانو په تخنیکي همکارۍ او د کندهار دکرنې ریاست د مالدارۍ آمریت تر مستقیمې څارنې لاندې د درېیو اونیو په موده کې تطبیق شو. د واکسین کولو موخه د طاعون وژونکې ناروغۍ مخنیوی، د څارویو روغتیا خوندي ساتل، د مالدارانو اقتصادي زیانونه راکمول او د هغوی ملاتړ بلل کېږي.
د کندهار دکرنې ریاست چارواکي وايي، د دې واکسین د تطبیق له امله به د څارویو د شېدو او غوښې تولید عادي پاتې شي، د ناروغیو خپرېدل به په وخت کنټرول شي او مسلکي کسانو ته به د کار زمینه برابره شي.
د یادونې وړ ده، چې له دې وړاندې هم د کندهار د کرنې ریاست په هڅو، د «اف.اې.او» او د هالنډ کمېټې په مالي ملاتړ، د دغه ولایت د ډنډ ولسوالی کې له ۳۰ زره زیات کوچني څاروي د درېیو بیلابیلو ناروغیو پر ضد وقایوي واکسین شوي وو، چې اوس مهال یې د تطبیق چارې په نورو ولسوالیو کې هم روانې دي.
