د خوست د کرنې ریاست او شیخ زاید پوهنتون د کرنې پوهنځۍ تر منځ د همغږۍ غونډه ترسره شوه

۱ تله ۱۴۰۴ هـ.ش
۳۰ رَبِیعُ الْأَوَّل ۱۴۴۷ هـ.ق
د خوست ولایت کرنې، اوبو لګولو او مالدارۍ ریاست په تالار کې د کرنې ریاست او د شیخ زاید پوهنتون د کرنې پوهنځۍ تر منځ د همغږۍ او همکارۍ غونډه ترسره شوه.
ددې غونډې په ترڅ کې د خوست د کرنې ریاست مرستیال مولوي اسلم خان منیب، د کرنې ریاست سلاکار او متخصص بهیرګل صابري، د حیواني روغتیا او مالدارۍ آمر ډاکټر انعام الله جاوید، د طبیعي سرچینو آمریت مدیرانو، کرنیزو څېړنو متخصصینو، د شیخ زاید پوهنتون د کرنې پوهنځۍ رییس، د څېړنو برخې آمرینو او درانو استادانو ګډون کړی وو.
د غونډې په ترڅ کې د کرنې ریاست لخوا ترسره شوې څېړنیزې تجربې، نوې علمي موندنې او د کرنې پوهنځۍ د استادانو او څېړنیزو برخو لاسته راوړنې سره تبادله او شریکې شوې. د خوست د کرنې ریاست سلاکار او متخصص بهیرګل صابري د کرنیزو څېړنو په برخه کې مهم علمي معلومات وړاندې کړل او د پوهنتون استادانو سره یې په ګډه د همکارۍ لارې چارې وڅېړلې.
د کرنې پوهنځۍ رییس له لوري د موجودو ستونزو او ننګونو یادونه وشوه، چې د کرنې ریاست رهبري یې په هوارولو کې د هر اړخیزې همکارۍ ژمنه وکړه. او همدارنګه د دواړو لوریو لخوا د شته ننګونو او فُرصتونو په موجودیت کې د کرنې او مالدارۍ سکتور پیاوړتیا لپاره علمي بحثونه ترسره شول.