ننګرهار کې ۸۰ تنو بزګرانو ته د ناروغیو هراړخیز کنټرول په موخه روزنه او وسایل ورکړل شو
دننګرهار د کرنې، اوبو لګولو او مالدارۍ ریاست په هڅو د ډاکار خیریه مؤسسې په همکارۍ د ننګرهار په کوټ، هسکه مېنه او روداتو ولسوالیو کې ۸۰ تنو بزګرانو ته د نباناتو هراړخیز کنټرول په موخه روزنه او وسایل ورکړل شو.
د ننګرهار د کرنې، اوبو لګولو او مالدارۍ رییس مولوي محمد ولي محسن وویل، چې یادو بزګرانو ته د ناروغیو مخنیوي ښه مدیریت، وقایي، درملنې، کرنیزو محصولاتو ساتنې، د چاپیریال او خاورې ککړتیا مخنیوي، انساني او حیواني روغتیا خوندیتوب او د افتونو تلپاتي مخنیوي په موخه روزنه ورکړل شوه.
ښاغلي محسن زیاته کړه، چې هر بزګر ته درمل شېندلو پمپ، عینکي، دستکشې، هورموني تلکونه او بروشري ورکړل شوي، ترڅو د ناروغیو مخنیوي او هراړخیز کنتول کې ترې ګټه پورته کړي.
