هلمند کې یوشمېر بزګران وروزل شول
۳ وږی ۱۴۰۴ هـ.ش
۱ رَبِیعُ الْأَوَّل ۱۴۴۷ هـ.ق
د هلمند ولایت د کرنې، اوبولګولو او مالدارۍ ریاست د کرنیزو چارو امریت اړوند د بوټو ساتنې او قرنطین عمومي مدیریت مسلکي کارکوونکو د یاد ولایت دمرکز لښکرګاه ښار د مختار په سیمه کې بزګرانو ته د جوارو د تڼې چینجي، د سپیرکي کنې او د سیاقاق ناروغیو د مخنیوي په اړه عامه پوهاوی ورکړ.
په دې غونډه کې کروندګرو ته هغه کیمیاوي درمل معرفي او ور وښودل شول، چې د یادو آفتونو او ناروغیو د له منځه وړلو تر څنګ چاپېریال ته هم لږ زیان رسوي.
همدارنګه بزګرانو ته لارښوونه وشوه، چې د ښه حاصلاتو ترلاسه کولو لپاره باید د آفتونو او ناروغیو د مخنیوي بنسټیزې لارې لکه نوبتي کرنه، د مقاوم تخم کارونه، د تخم درملنه، د پاک تخم کرل، د کرنې پر وخت او په سمه اندازه ترسره کول، د اوبو منظمه کارونه او د حیواني او کیمیاوي سرو په خپل وخت او اندازه استعمال په پام کې ونیسي.
