د لوګر دکرنې ریاست؛ قوشتیپې کانال لپاره ډالۍ شوي ۲۱۵ زره نیالګي ښه وده کړې

۲۰ زمری ۱۴۰۴ هـ.ش
۱۷ صَفَر المُظَفَّر ۱۴۴۷ هـ.ق
د لوګر د کرنې، اوبولګولو او مالدارۍ ریاست چارواکي وایي، چې د دې ولایت د بزګرانو له لوري، د قوشتیپې کانال زرغونتیا په موخه ډالۍ شوي ۲۱۵ زره قلمه، چنار او سنځلو نیالګي ښه وده کړې ده.
د لوګر ولایت د کرنې او مالدارۍ ریاست د عوایدو د تنظیم آمر، قاري عبدالبصیر شاهد وویل؛ چې یاد نیالګي تېرکال د کرنې ریاست په نوښت د دې ولایت له مرکز او بېلابېلو ولسوالیو د بزګرانو په همکاري راټول شوي و، چې په د یو شاوخوا یو کال په تېرېدو سره ښه وده کړې ده.
دغه راز نوموړی په  قوشتیپې کانال کې د اړوندې برخې د مسوولینو له قوله وایي، چې د لوګر نیالګي د یادې سیمې له هوا او خاورې سره ښه تطابق لري او د شاوخوا یو کال په تېرېدو سره دغه نیالګي آن له دوو متر څخه زیات لوړ شوي او ښه نمو یې کړې ده.
 د یادونې وړ ده، چې دغه نیالګي د قوشتیپې کانال د زرغونتیا لپاره  تېر کال د لوګر کرنې او مالدارۍ ریاست له لوري د ملي پراختیا ادارې استازو ته سپارل شوي وو.