د ننګرهار کانال شرکت په بڼونو کې خرما حاصل ته رسېدلې
۱۴ زمری ۱۴۰۴ هـ.ش
۱۱ صَفَر المُظَفَّر ۱۴۴۷ هـ.ق
د ننګرهار وادې کرنيز شرکت په بڼونو کې خرما ښه حاصل ورکړې او د تېر په پرتله په کې زياتوالی راغلی، تمه ده چې ډېر ژر به دغه خوږه او تازه مېوه بازار ته وړاندې شي.
د ننګرهار د کانال شرکت چارواکي وایي، د دغې ادارې اړوند له خرما بڼ څخه به سږ کال څه باندې ۲۰ ټنه خرما راټوله شي. د ننګرهار کانال شرکت د چارواکو په خبره د دغې ادارې د هډې فارم په ۴۰ جریبه ځمکه د خرما بڼونه جوړ شوي دي.
دغه ۴۰ جريبه خرما باغ کې ۲۷۰۰ د خرماو بوټي کرل شوي دي. د دغه بڼ ترڅنګ هلته په ٢٥ جریبه نوره ځمکه هم د خرما بڼ جوړ شوی چې اوس پکې شاوخوا زر ونې کېنول شوي دي. د خرماو همدې لوړو حاصلاتو اوس په دغه ولايت کې زیات هېوادوال او پانګهوال لېواله کړي، چې په خپلو ځمکو د خرما بڼوڼه جوړ کړي. د ننګرهار د کانال شرکت تر چتر لاندې د خرما د دغه بڼ سربېره د مالټو او زیتونو پراخ بڼونه هم شته چې هر کال زرګونه ټنه حاصلات ترې راټولېږي
د ننګرهار وادې کرنيز شرکت هڅه کوي، چې هر کال د خرما بڼونو ته پراختيا ورکړي، چې په برکت به يې وطنۍ مېوه زیاته او د هېواد بازارونو ته به په ارزانه بيه وړاندې شي.
