هډې فارم کې د ننګرهار وادي کرنیز شرکت د امو د حاصلاتو بریالی فصل
۹ زمری ۱۴۰۴ هـ.ش
۶ صَفَر المُظَفَّر ۱۴۴۷ هـ.ق
هډې فارم پورې اړوند د ننګرهار وادي کرنیز شرکت د ثمرخېلو قوریه کې د ام (مېنګو) بوټو وده سږ کال د پام وړ وه، او حاصل یې په بریالیتوب سره راټول شوی دی.
د یادې قوریې مسؤل مدیر، د دغې لاسته راوړنې اصلي لامل د قوریې د پرسونل له لوري د بوټو پر وخت او منظم پالنه، سالمه روزنه او دوامداره تخنیکي پاملرنه بولي. د نوموړي په وینا، د امو د راټولولو بهیر په مسلکي او تخنیکي ډول تر سره شوی، څو له ونو څخه اعظمي حاصل ترلاسه شي او د راتلونکو فصلونو لپاره لا غوره شرایط رامنځته شي.
د ننګرهار وادي کرنیز شرکت د کرنې د عصري کولو، د مېوې ونو د ودې او د کرنې د پیاوړتیا په موخه خپلو هڅو ته دوام ورکړی. یاد شرکت هڅه کوي، چې د نوې ټکنالوژۍ او تجربو له لارې کرنیز فعالیتونه لا اغېزمن کړي او د سیمې بزګرانو ته مثبت بدلونونه راولي.
د یادونې وړ ده، چې د ثمرخېلو قوریې د ام مېوې خوند، ذائقه او اندازه د بازار د اړتیاوو مطابق او له نورو سیمو سره د سیالۍ وړ ګڼل شوې ده، چې دا خپله د محلي تولیداتو پر ارزښت ښه اغېزه کوي.
