د کندهار بولدک ولسوالی کې پر لسګونو کورنیو د شېدو راټولولو او لېږد توکي ووېشل شوې
۲۳ چنګاښ ۱۴۰۴ ه.ش
۱۸ مُحَرَّمُ الحَرام ۱۴۴۷ه.ق
د کندهار د کرنې، اوبو لګولو او مالدارۍ ریاست په هڅه، د اروپایي ټولنې په مالي او د هالنډ کمیټې په تخنیکي همکارۍ د کندهار په بولدک ولسوالی کې ۶۴ بېوزلو او اړمنو کورنیو ته د ۸۷ زره افغانیو په ارزښت د شېدو راټولولو او لېږد توکي ووېشل شول.
په دغه مرسته کې هرې کورنۍ ته یو منرال بلاک، دشېدو راټولولو لپاره یو سطل، او د شېدو د انتقال او ساتنې لپاره یوه المونیمي ډبه ورکړل شوې ده. دا توکي به مرسته وکړي، چې شیدې د څارویو څخه په صحي او معیاري لوښو کې راټولې، او بیا په تازه ډول بازار ته وړاندې شي.
د دې مرستې موخه د بېوزلو کورنیو ملاتړ، د شېدو په راټولولو او لېږد کې د حفظالصحې اصولو مراعت، او په معیاري لوښو کې د شېدو راټولول او بازار ته انتقالول دي.
د یادونې وړ ده، چې له دې وړاندې هم د کندهار د کرنې ریاست په هڅو او د اروپایي ټولنې په مالي ملاتړ، شاوخوا یوه میاشت وړاندې، ۶۰ بېوزلو کورنیو ته د وړیو څخه د تار ایستلو او د خیاطۍ ماشینونه وېشل شوې وه.
