کندهار ته د عشر او زکات لوی رییس سفر او د عشر او زکات اړوند مهمې ناستې
۱۷ چنګاښ ۱۴۰۴ ه.ش
۱۲ مُحَرَّمُ الحَرام ۱۴۴۷ه.ق
د کرنې، اوبولګولو او مالدارۍ وزارت د عشر او زکات لوی رییس الحاج مولوي ندا محمد عابد کندهار ولایت ته د خپل کاري سفر په ترڅ کې د دغه ولایت له یو شمېر مهمو مسؤلینو او اړوندو ادارو سره کتنې او رغنده ناستې ترسره کړې.
د عشر او زکات لوی رییس کندهار ته د خپل سفر په ترڅ کې ددې ولایت دکرنې رییس سره په کتنه کې پر اړوندو موضوعاتو خبرې اترې وکړې.
ددې لیدنې په ترڅ کې د کندهار دکرنې رییس، د عشر او زکات له لوی رییس او ورسره مل پلاوي هرکلی وکړ، او دغه سفر یې د ارزونې، نظارت او همغږۍ په موخه یو مثبت او ګټور ګام وباله. نوموړي زیاته کړه، چې د چارو ښه مدیریت او شفافیت د دوامداره اړیکو او وخت په وخت لیدنو ته اړتیا لري.
په یاده ناسته کې د ولایت په کچه د عشر او زکات مسؤلینو ګډون کړی و. د مولوي ندا محمد عابد په مشري د دې ناستې پر مهال د ولایتي مسؤلینو او د عشر او زکات ریاست ترمنځ د مؤثرې همغږۍ، متقابل تفاهم، د اړتیا پر وخت د مرستې او همکارۍ ژور بحث وشو، او دواړو لوریو د یو بل ملاتړ ته ژمن پاتې شول.
همداراز، په دې ناسته کې د عشر او زکات د راټولولو د پروسې اړوند ځینې شته ستونزې وڅېړل شوې او د مسؤلینو له لوري ورته لازم حل لارې وړاندې شول. د ولایت مسؤلینو ژمنه وکړه، چې د دغې پروسې ملاتړ به کوي، مداخله به نه کوي، او د امیرالمؤمنین شیخ الحدیث مولوي هبة الله اخندزاده حفظه الله د ځانګړي حکم پر بنسټ به هر اړخیزه مرسته او ملاتړ کوي.
د غونډې په اوږدو کې پر ګڼو مهمو موضوعاتو مفصل بحثونه وشول، چې پکې د نوي چاپ شوي کتابچو اغېزمن استعمال، د کتابچو خوندیتوب او ساتنه، د عاشرینو د نوې تګلارې دقیق تطبیق، د کارکوونکو پاتې معاشاتو (لومړۍ، دویمه او درېیمه میاشت) اجرا، د حاضرۍ پر وخت ثبتول، د عشر او زکات د راټول شویو مالونو د پلور په پروسه کې شفافیت، د غنمو د زېرمه کولو لپاره د ګدامو ترلاسه کول، په چارو کې صداقت، ایمانداري او د فساد مخنیوی، خلکو سره ښه چلند، د نصف عشر د راټولولو تطبیق او دشخصي ګټو او سؤ استفادو مخنیوی شامل وو.
په پای کې ټولو ولایتي چارواکو دا ډول سفرونه ډېر اغېزناک وبلل، د دوام غوښتنه یې وکړه، او د ښې همکارۍ ژمنه یې تازه کړه. دوی ټینګار وکړ چې د شرعي حکمونو په رڼا کې د عشر او زکات پروسه به لا شفافه او مؤثره شي، او ولس ته به هم شرعي حقونه په وخت او مناسب ډول ورسېږي.
