د کندهار تخته پل ولسوالی کې د اوبو پنځه حوضونه جوړ او ګټې اخیستنې ته وسپارل شول

د کندهار د کرنې، اوبو لګولو او مالدارۍ ریاست د پراختیایي بودیجې له لارې، د طبیعي سرچینو آمریت په تخنیکي همکارۍ، د تخته پل ولسوالی په پنځو مهمو سیمو کې د اوبو د زېرمه کولو پنځه حوضونه جوړ او نن ورځ رسماً ګټې اخیستنې ته وسپارل شول.
یاد حوضونه د څادرګه، تنګي قلا، حاجیانو، ښادیزی او د تنګي غره لمنو په سیمو کې د ۸۰۰ زره افغانیو په لګښت جوړ شوي، چې د کوچیانو د څارویو لپاره د اوبو د ذخیره کولو مهمه پروژه بلل کېږي.
د پروژې مسئول انجنیر نورمحمد همکار وایي، هر حوض ۴۰ متره اوږد، ۳۰ متره سور او ۱.۵ متره ژوروالی لري، چې د مستطیل بڼه یې د اوبو ساتنې ظرفیت لوړوي. د دې پروژې له تطبیق سره به د یادو سیمو کوچیان وکولای شي خپل څاروي له نږدې منابعو څخه اوبه کړي، او له اوږدو مزلونو ځان وژغوري.
انجنیر همکار زیاته کړه، چې د حوضونو د جوړولو چارې په شاوخوا درې میاشتو کې بشپړې شوې، چې په ترڅ کې یې لسګونو تنو ته د لنډمهاله کار زمینه هم برابره شوې وه، ترڅو د سیمه‌ییزو خلکو اقتصادي وضعیت ته هم مثبته اغېزه ورسوي.
د کندهار د کرنې ریاست چارواکي وایي، د اسلامي امارت له راتګ راهیسې په کندهار کې د کرنې، اوبولګولو او مالدارۍ سکتور ته ځانګړې پاملرنه شوې، او په ځانګړي ډول لیرې پرتو سیمو ته د اساسي خدماتو رسولو هڅې روانې دي. د دې ترڅنګ، څه باندې یوه اوونۍ وړاندې هم په خاکریز ولسوالی کې د څارویو او کرنیزو ځمکو د خړوبولو په موخه د یو بل حوض د جوړېدو چارې پیل شوې دي.
یادې پروژې به نه یوازې د کوچیانو او مالدارانو د ستونزو حل ته زمینه برابره کړي، بلکې د اوبو د مدیریت، قدرتي سرچینو د خوندي کولو او د دوامدار کرنیز پرمختګ لپاره هم ګټور ګام وي.