اروزګان کې سږ کال د غنمو په کرکېله او حاصلاتو کې د پام وړ زیاتوالی راغلی
۲۷ غبرګولی ۱۴۰۴ ه.ش
۲۰ ذُو الحِجَّةِ ۱۴۴۶ه.ق
روزګان کې د نورو کلونو په پرتله سږکال د غنمو په حاصلاتو کې د پام وړ زیاتوالی راغلی، چې کروندګر یې راتلونکو کلونو کې د غنمو کښت ته هیلهمند کړي دي.
د روزګان کرنې، اوبو لګولو او مالدارۍ ریاست د معلوماتو له مخې سږ کال روزګان کې پر ۲۷ زره ۱۵۸ هکټاره ځمکه غنم کرل شوې وه، چې له یادو کروندو څخه غنم شاوخوا ۹۶ زره ۵۴۸.۵۵ ټنه حاصلات لاس ته راغلي دي.
روزګان کې د غنمو حاصلاتو کې داسې مهال زياتوالی راغلی چې په ټول هېواد کې د نشي توکو پر کرکېله او پېر او پلور د حکومت لهخوا بنديز لګول شوی دی.
د روزګان دکرنې ریاست چارواکي وایي، چې د نورو کلونو په پرتله سږکال غنمو ښه نتيجه ورکړې ده، سږکال نه کوم افت لري او نه کومه ناروغي لري، په نورو کلونو کې به غنمو ناروغۍ درلوده، خو سږکال ته چې وګورو حاصلاتو کې د پام وړ زياتوالۍ ښکاره کوي.
د روزګان دکرنې ریاست چارواکي وویل: «زرګونو بزګرانو ته مو اصلاح شوي تخمونه او سرې وېشلي او زرګونو نورو بزګرانو ته مو نغدي مرستې رسولي. د همکارو موسسو په مرسته همداشان د ناروغیو د مخنيوي برخه کې د کرنې ریاست د دوی په خدمت کې دی، تشخیص د ناروغیو شوي دی، لازمې لارښوونې ورته شوي دي.»
د کوکنارو د کښت مخنیوی، د کرنیزو سیمو زیاتوالی، د غنمو دکرنیزو تخمونو او کیمیاوي سرو پر وخت وېشل، د بزګرانو هڅونه او اطلاع رسونه هغه لاملونه دي، چې ورسره سږکال روزګان کې د غنمو د حاصلاتو کچه لوړه شوې ده.
