د کرنې وزارت د عشر او زکات لوی رییس د فاریاب ولایت چارواکو او علماوو سره جلاجلا ناستې وکړې
د کرنې، اوبولګولو او مالدارۍ وزارت دعشر او زکات لوی رییس الحاج مولوی ندا محمد عابد د کرنې، اوبو لګولو او مالدارۍ د وزیر الحاج مولوی عطاءالله عمري په ځانګړي لارښوونه فاریاب ولایت ته د سفر په ترڅ کې ددې ولایت له سیمه ییزو چارواکو او علماوو سره جلاجلا ناستې وکړې.
د دغه سفر موخه په فاریاب ولایت کې دعشر او زکات اړوند مهمو موضوعاتو ارزونه، د نظرونو تبادله، د ګډو همکاریو پیاوړتیا او د اړوندو ادارو ترمنځ لا ښه همغږي رامنځته کول وو.
د سفر په ترڅ کې، د کرنې وزارت دعشر او زکات لوی رییس او ورسره مل پلاوي د فاریاب والي، د ولایت مرستیال، د تعقیب او فرامینو د مسؤلینو او د یاد ولایت د علماوو د شورا له رییس سره جلا جلا ناستې ترسره کړې.
په دغو ناستو کې مولوي ندا محمد عابد د کرنې وزیر او د مالي او اداري چارو مرستیال پیغامونه او لارښوونې اړوندو چارواکو ته ورسول، او د عشر او زکات د نظام لا ښه تطبیق لپاره یې عملي وړاندیزونه مطرح کړل.
د ناستې پر مهال، د فاریاب محترم والي دعشر او زکات په چارو کې د هر اړخیزو، شفافو او صادقانه همکاریو ژمنه وکړه او ویې ویل چې د اسلامي اصولو په رڼا کې به د دې مهم نظام پیاوړتیا ته پوره توجه کوي.
