لوګر کې د کانګو وینه بهېدونکې تبې د مخنیوي کمپاین پیل شو

د لوګر د کرنې، اوبو لګولو او مالدارۍ ریاست د ملګرو ملتونو د خوړو اوکرنې ادارې «اف.اې.او» په همکارۍ په دې ولایت کې د کانګو تبې وینه بهېدونکې ناروغۍ د مخنیوي کمپاین پیل کړی دی.
د لوګر ولایت د کرنې، اوبو لګولو او مالدارۍ ریاست چارواکي وویل، چې د دغه کمپاین په لړ کې به د لوګر ولایت مرکز پُل علم، برکي برک او محمدآغې ولسوالۍ زرګونه څاروي، غوجلې او د څارویو پېر- پلور ځایونه دواپاشي شي.
دوی زیاته کړه، چې دا پروګرام د سیمه ییزو وترنر ډاکترانو په مرسته پليکېږي، چې ډاکترانو ته د کانګو تبې ضد درمل، دواپاشي پمپونه، او د حفظ الصحې اړوند وسایل برابر شوي، تر څو د ناروغۍ د خپرېدو مخه ونیول شي.
کانګو تبه یوه خطرناکه وېروسي ناروغي ده، چې د کنو له لارې د څارویو او انسانانو ترمنځ انتقالېږي. 
د لوګر د کرنې ریاست رهبرۍ د انسانانو خوندیتوب او د ناروغۍ د پراخېدو د مخنیوي په موخه دا ډول کمپاینونه ګټور بولي او نورو ولسوالیو ته یي د غځولو غوښتنه هم وکړه.