کندهار کې د ۱۵۰ زره ډالرو په لګښت د تیلي نباتاتو کرنې پروژه پرانیستل شوه

د کرنې، اوبو لګولو او مالدارۍ وزارت په رهبرۍ، د کندهار د کرنې ریاست په تخنیکي همکارۍ او په افغانستان کې د ترکیې د همکارۍ او همغږۍ ادارې «ټیکا»په مالي ملاتړ، د کندهار په ولایت کې د تیلي نباتاتو د کرنې پروژه د شاندارو مراسمو په ترڅ کې پرانیستل شوه. دا پروژه چې ۱۵۰ زره امریکايي ډالره لګښت لري، د کندهار ولایت په نوروزي څېړنیز فارم کې پر ۵۰۰ جریبه ځمکه تطبیقېږي.
ددې پروژې په پرانیست غونډه کې د کرنې وزارت دکرنې او مالدارۍ مرستیال او کفیل الحاج مولوي صدراعظم عثماني، د کندهار د کرنې رییس الحاج مولوي فضل‌الباري فضلي، د ځانګړي ځواک مشر او د کندهار امنیه قوماندان الحاج طالب مولوي، د کرنې وزارت د څېړنو لوی رییس الحاج مولوي نصرت‌الله طلحه، د ټیکا مؤسسې رییس فاضل آکین اردوغان، د ترکیې د همکارۍ او همغږۍ ادارې مرستیال رحمان نوردون، د بېلابېلو امارتي ادارو استازي، دکرنې ریاست چارواکو،  د ترکیې یوشمېر متخصصین او ګڼ شمېر کرنیز مسئولین ګډون کړی و.
غونډه د قرآن کریم په تلاوت پیل شوه. د کندهار د کرنې رییس الحاج مولوي فضل‌الباري فضلي د پروژې پرانیسته د افغانستان د کرنیز سکتور لپاره مهم ګام وباله. نوموړي له ترکیې هېواد څخه مننه وکړه او څېړنې یې د کرنیز پرمختګ او اقتصادي ودې لپاره مهمې وبللې، او له نړۍوالو یې د کوکنارو لپاره د بدیلو نباتاتو د موندلو په برخه کې د همکارۍ غوښتنه وکړه. همداراز یې له کورنیو پانګوالو وغوښتل، چې په دغه برخه کې پانګونه وکړي.
د کرنې وزارت دکرنې او مالدارۍ مرستیال مولوي صدراعظم عثماني د ټیکا مؤسسې له مالي ملاتړ او همکاریو مننه وکړه او ویې ویل، چې وزارت د بزګرانو اقتصادي پیاوړتیا ته ژمن دی او د بزګرانو اقتصادي پیاوتیا په برخه کې د کرنې وزارت رول مهم وباله. هغه د تیلي نباتاتو د کرنې، اصلاح شویو تخمونو، او کیمیاوي سرو اهمیت ته اشاره وکړه او زیاته یې کړه، چې سویابین هم د پام وړ کرنیز محصول دی چې پراخې هڅې پرې روانې دي. نوموړي هیله وښوده، چې افغانستان به د کرنې او مالدارۍ له لارې پر ځان بسیا او په راتلونکي کې به واردات کم او صادرات به ډېرشي.
په افغانستان کې د ترکیې د همکارۍ او همغږۍ ادارې «ټیکا» رییس فاضل آکین اردوغان د یادې پروژې له پیل خوښي وښوده او ژمنه یې وکړه چې د نوروزي څېړنیز فارم لپاره به اصلاح شوي تخمونه، سرې او نور تخنیکي وسایل برابر کړي. هغه وویل، چې دا پروژه د کوکنارو لپاره یو مؤثر بدیل کیدای شي، او ټیکا به د تیلي نباتاتو د غوړیو تولید ته هم زمینه برابره کړي.
په پای کې یو شمېر نورو چارواکو هم خبرې وکړې او دغه پروژه یې د کرنې د سکتور د پیاوړتیا لپاره ارزښتناک ګام وباله. مراسم د نبوي بګړۍ پر سر ایښودو، دودیزو رسوماتو او دعا سره پای ته ورسېدل.