د هلمند دوو ولسوالیو کې یوشمېر مستحقو بزګرانو ته شنې خونې ووېشل شوې

۱۵ غویی ۱۴۰۴ ه‍.ش
۷ ذُو ٱلْقَعْدَةِ ۱۴۴۶ه‍.ق
د هلمند ولایت د کرنې، اوبولګولو او مالدارۍ ریاست لخوا،  د ملګرو ملتونو نړۍوالې ادارې سره په ګډه، د نادعلي او ګرشک ولسوالیو کې ۲۸ مستحقو بزګرانو ته شنې خونې ووېشل شوې.
د دغه پروګرام په ترڅ کې، هرې شنې خونې ته سولري هندارې، د اوبو ټانکی او نور اړین توکي ورسره ورکړل شوي، ترڅو بزګران وکولای شي د سبو او نورو فصلونو تولید زیات کړي. دغه شنې خونې د یادې موسسې له لوري د مسلکي انجینرانو لخوا د مستحقینو په ځمکه کې نصبېږي.
په ورته وخت کې بزګرانو د دغو مرستو هرکلی وکړ او هیله یې وښوده چې دا ډول برنامې دې دوام ومومي او نور مستحق بزګران دې هم ترې برخمن شي. دوی وویل، چې دا ډول شنې خونې د کرنیزو حاصلاتو د زیاتوالي، د کورنۍ اقتصادي پیاوړتیا او د اقلیم له بدلون سره د مقابلې لپاره اغېزمن رول لري.
دا پروژه د هلمند د کرنیزو خدمتونو د پراخولو او د بزګرانو د تولیداتو د لوړولو په موخه پيل شوې ده.
د هلمند د کرنې، اوبو لګولو او مالدارۍ ریاست چارواکي وایي، دوی په دې ولایت کې د کرنیزو حاصلاتو د لوړولو او د موسمي نباتاتو د کرکېلي د پراختیا په پار هلې ځلې کوي او د شنو خونو د حاصلاتو ښې پایلې دوی هڅولي چې د شنو خونو د جوړولو لړۍ نوره هم پیاوړې او ګړندۍ کړي.