د کندهار ارغستان کې ۱۵۴ بزګرانو ته د پنبې اصلاح شوی تخم او کیمیاوي سره ووېشل شوه

۲ غویی ۱۴۰۴ ه‍.ش
۲۴ شَوّالُ المُکَرَّم ۱۴۴۶ه‍.ق
د کندهار ولایت ارغستان ولسوالۍ کې د کرنې، اوبو لګولو او مالدارۍ ریاست په هڅو، د ملګرو ملتونو د نشه‌يي توکو او جرمونو پر وړاندې د مبارزې دفتر یو ان او ډي سي په مالي ملاتړ او د هالنډ کمېټې په تخنیکي همکارۍ، د کرنې اړوند چارواکو تر څارنې لاندې، ۱۵۴ اړمنو بزګرانو ته د پنبې اصلاح شوی تخم او کیمیاوي سره ووېشل شوه.
په دې مرسته کې هر بزګر ته ۱۰ کیلوگرامه اصلاح شوی تخم او ۵۰ کیلو توره کیمیاوي سره ورکړل شوه، څو د کالکۍ «پنبې» د روان فصل کرنه ښه او مؤثره ترسره شي.
د یادې پروژې یوه مهمه برخه دا ده، چې پر مرستو سربېره، بزګرانو ته به د پنبې د معیاري کرنیزو میتودونو په اړه عملي روزنه هم ورکړل شي، تر څو حاصلات زیات او کرنه اغېزمنه شي.
د دې مرستې موخه د اړمنو بزګرانو مالي ملاتړ، د اصلاح شویو تخمونو ترویج، د میکانیزه کرنې دودول، کرنیزو حاصلاتو زیاتوالی او بزګرانو ته د کاري فرصتونو برابرول دي.
د یادونې ده چې د همدې پروګرام له مخې، د کالکۍ د روان فصل پر مهال به بزګرانو ته سپینه کیمیاوي سره هم ووېشل شي، څو د تولیداتو کچه نوره هم لوړه شي.